" پٹرولیم مصنوعات کی قیمتیں خطے کے دیگر ممالک سے کم ہیں"
پیٹرولیم قیمتوں کے تعین کے نظام میں اصلاحات پر وزیراعظم کی قائم کردہ کمیٹی کا اہم اجلاس ہوا جس کی صدارت وزیر پٹرولیم علی پرویز ملک نے کی۔
اعلامیہ کے مطابق اجلاس میں عالمی مارکیٹ کے تناظر میں پٹرولیم قیمتوں کے تعین کے مختلف طریقہ کار کا جائزہ لیا گیا۔
کمیٹی نے سفارش کی کہ اوگرا روزانہ قیمتوں کا ڈیٹا ویب سائٹ پر جاری کرے تاکہ عوام کو قیمتوں کے تعین کا بینچ مارک معلوم ہو۔
اجلاس میں پٹرولیم پرائس اسٹیبلائزیشن فنڈ کو قواعد پر مبنی، شفاف اور صوابدیدی فیصلوں سے پاک نظام کے تحت چلانے پر اتفاق ہوا جبکہ تیل کی سپلائی چین کی ڈیجیٹائزیشن پر تمام اراکین نے اتفاق کرتے ہوئے شفافیت بڑھانے پر زور دیا۔
دوران اجلاس گفتگو کرتے ہوئے وزیر پٹرولیم علی پرویز ملک کا کہنا تھا کہ آبنائے ہرمز کی دوبارہ بندش سے عالمی توانائی منڈیوں میں غیر یقینی صورتحال پیدا ہوئی ہے، آبنائے ہرمز کی دوبارہ بندش سے کمیٹی کی ذمہ داری مزید اہم ہو گئی ہے۔
انہوں نے کہا کہ کے پی ایم جی سٹڈی کے مطابق پاکستان میں پیٹرول کی قیمتیں بنگلہ دیش، سری لنکا اور ترکیہ سے کم جبکہ بھارت کے تقریباً برابر ہیں۔
یہ بھی پڑھیں:حکومت کا پٹرولیم مصنوعات کی قیمتوں میں اضافے کا اعلان
وزیر پٹرولیم کا کہنا تھا کہ ڈیزل کی مقامی پیداوار میں اضافے اور درآمدی ڈیزل پر انحصار کم کرنے کے لیے ریفائنری پالیسی میں تبدیلی سے متعلق تجاویز دی ہیں، ڈیزل کی مقامی پیداوار بڑھنے سے پاکستان کی توانائی سلامتی کو تقویت ملے گی۔
ذرائع کے مطابق پٹرولیم پرائسنگ کمیٹی کا آئندہ اجلاس حتمی ہو گا جس کے بعد سفارشات وزیراعظم کو ارسال کی جائیں گی۔
