آئندہ برس حج اخراجات میں مزید اضافے کا امکان
ذرائع وزارت مذہبی امور کے مطابق آئندہ سال مختصر حج پیکیج کی لاگت تقریباً 13 لاکھ روپے مقرر کیے جانے کا امکان ہے، مختصر حج کا دورانیہ 20 سے 22 روز پر مشتمل ہوگا جس کے لیے عازمین کو گزشتہ سال کے مقابلے میں تقریباً ایک لاکھ روپے اضافی ادا کرنا پڑ سکتے ہیں۔
اسی طرح طویل حج پیکیج بھی مہنگا ہونے کا امکان ہے ،طویل حج کی مجوزہ قیمت 12 لاکھ روپے تک مقرر کی جا سکتی ہے، جو گزشتہ سال کے مقابلے میں تقریباً 50 ہزار روپے زائد ہو گی، طویل حج کا دورانیہ 40 روز پر مشتمل ہو گا۔
خیال رہے کہ حج 2026 میں پاکستانی عازمین کے لیے سرکاری حج اخراجات نسبتاً کم رکھے گئے تھے، 2026 میں 40 روزہ طویل حج پیکیج 11 لاکھ 50 ہزار روپے جبکہ 25 روزہ مختصر حج پیکیج 12 لاکھ روپے میں مقرر کیا گیا تھا۔
سرکاری پالیسی میں مجموعی طور پر حج 2026 کے اخراجات کا تخمینہ 11 لاکھ 50 ہزار سے 12 لاکھ 50 ہزار روپے کے درمیان بتایا گیا تھا۔
یہ بھی پڑھیں: حج درخواستوں کا سٹیٹس جاننے کیلئے طریقہ کار آگیا
ذرائع کا کہنا ہے کہ آئندہ سال حج اخراجات میں اضافے کی وجہ سعودی عرب میں رہائش، ٹرانسپورٹ، خوراک، فضائی سفر اور دیگر انتظامی اخراجات میں ممکنہ اضافہ ہو سکتا ہے۔
تاہم حتمی پیکج کا اعلان وزارت مذہبی امور کی جانب سے پالیسی اور سعودی حکام کے ساتھ معاملات مکمل ہونے کے بعد کیا جائے گا۔
