کراچی: آٹے کی نئی سرکاری قیمتوں کا نوٹیفکیشن جاری
کمشنر کراچی سید حسن نقوی کی جانب سے جاری نوٹیفکیشن کے مطابق ریگولر ڈھائی نمبر آٹے کی ہول سیل سرکاری قیمت 122 روپے فی کلو جبکہ ریٹیل قیمت 125 روپے فی کلو مقرر کی گئی ہے۔
اسی طرح فائن آٹے کے نئے ہول سیل سرکاری نرخ 132 روپے فی کلو مقرر کیے گئے ہیں جبکہ اس کی ریٹیل سرکاری قیمت 135 روپے فی کلو رکھی گئی ہے۔
نوٹیفکیشن کے مطابق چکی کے آٹے کی سرکاری قیمت 145 روپے فی کلو مقرر کی گئی ہے لیکن شہر کے مختلف علاقوں میں یہ 170 روپے فی کلو تک فروخت کیا جا رہا ہے۔
دوسری جانب سرکاری نرخ نامہ جاری ہونے کے باوجود مارکیٹ میں آٹا مہنگے داموں فروخت کیا جا رہا ہے، بازاروں میں ریگولر آٹا 135 روپے فی کلو تک بیچا جا رہا ہے جبکہ فائن آٹے کی سرکاری قیمت 135 روپے فی کلو مقرر ہونے کے باوجود کئی علاقوں میں یہ 145 روپے فی کلو تک دستیاب ہے۔
یہ بھی پڑھیں: ملک بھر میں آٹے کی قیمتوں میں ہوشربا اضافہ
شہریوں کا کہنا ہے کہ آٹے کی قیمتوں میں اضافے سے روٹی اور نان کی قیمتوں پر بھی اثر پڑے گا جس سے غریب اور متوسط طبقے کے گھریلو بجٹ پر مزید بوجھ پڑے گا۔
عوام نے انتظامیہ سے مطالبہ کیا ہے کہ آٹے کے سرکاری نرخوں پر عملدرآمد یقینی بنایا جائے اور منافع خوروں کے خلاف کارروائی کی جائے۔
