کراچی: ہر طرح کے رکشوں پر پابندی عائد کرنے کا فیصلہ
ڈی آئی جی ٹریفک کراچی پیر محمد شاہ نے کہا ہے کہ شہر میں ہر طرح کے رکشوں پر پابندی عائد کرنے کی تیاری کی جا رہی ہے تاہم سڑکوں پر صرف وہی رکشے چل سکیں گے جن میں میٹر نصب ہو گا۔
ان کا کہنا تھا کہ چنگچی رکشوں کو مرکزی شاہراہوں سے ہٹانے کے لیے اقدامات کیے جا رہے ہیں، شہر میں ٹریفک کے دباؤ، غیر قانونی رکشوں اور بغیر ضابطے چلنے والی گاڑیوں کے باعث شہریوں کو شدید مشکلات کا سامنا ہے، اسی لیے ٹریفک نظام میں بہتری کے لیے سخت فیصلے کیے جا رہے ہیں۔
پیر محمد شاہ نے ای چالان سے متعلق بات کرتے ہوئے کہا کہ شہریوں کو اس نظام کے حوالے سے سنجیدہ مسائل درپیش ہیں، جنہیں حل کرنے کے لیے نئی پالیسی تیار کی جا رہی ہے تاکہ عوام کو ریلیف فراہم کیا جا سکے۔
انہوں نے بتایا کہ ای ٹکٹنگ سیف سٹی منصوبے کا حصہ ہے اور اس کا مقصد ٹریفک قوانین پر عملدرآمد کو مؤثر بنانا ہے، ای چالان آٹو جنریٹڈ ہوتے ہیں، اس لیے بعض اوقات غلطیاں بھی ہو جاتی ہیں تاہم ای چالان سسٹم اور لین مارکنگ سے ٹریفک کی روانی میں بہتری آئی ہے۔
یہ بھی پڑھیں: کراچی کی اہم شاہراہوں پر رکشہ کا داخلہ ممنوع قرار
ڈی آئی جی ٹریفک کے مطابق کراچی میں تقریباً 45 ہزار گاڑیاں ایسی ہیں جو اصل مالکان کے نام پر استعمال نہیں ہو رہیں جبکہ جعلی نمبر پلیٹ والی گاڑیوں کو تھانوں کے حوالے کیا جا رہا ہے۔
انہوں نے کہا کہ گزشتہ برس کراچی میں ہیوی ٹریفک کے باعث 164 اموات ہوئیں تاہم اب ان واقعات میں 45 فیصد کمی آئی ہے، کراچی ٹریفک مینجمنٹ کمپنی کے قیام پر بھی کام جاری ہے۔
