حج 2027: درخواستوں کا سٹیٹس جاننے کیلئے طریقہ کار آگیا
وزارتِ مذہبی امور کی جانب سے عازمینِ حج کی سہولت کے لیے حج ڈیجیٹل سسٹم میں ایک بڑی اور اہم اپ ڈیٹ متعارف کرائی گئی ہے۔
نئے ڈیجیٹل سسٹم کے تحت سال 2027 سے 2030 کے حج سائیکل کے لیے رجسٹرڈ افراد اب گھر بیٹھے انٹرنیٹ کے ذریعے اپنی درخواستوں کا موجودہ سٹیٹس آن لائن چیک کر سکیں گے۔
یہ منفرد فیچر نیشنل انفارمیشن ٹیکنالوجی بورڈ (این آئی ٹی بی) نے تیار کیا ہے جس کا بنیادی مقصد حج کے پورے طریقہ کار کو سادہ اور شفاف بنانا ہے۔
یہ نئی سہولت آنے کے بعد اب انفرادی طور پر رجسٹرڈ افراد یا گروپ کی صورت میں درخواست دینے والے عازمین کو معلومات کے حصول کے لیے کسی بھی سرکاری دفتر یا بینک کے چکر نہیں کاٹنا پڑیں گے بلکہ انہیں حج پورٹل کے ذریعے آن لائن ہی اپنی تفصیلات تک تیز ترین رسائی حاصل ہو گی۔
یہ بھی پڑھیں: گریڈ 19 کے سینئرافسر سید وحید شاہ جوائنٹ سیکرٹری حج تعینات
وزارتِ مذہبی امور حکام کا کہنا تھا کہ اس اپ ڈیٹ کا مقصد حج درخواست گزاروں کے لیے ڈیجیٹل سروسز کو بہتر بنانا ہے، نئے سسٹم کے ذریعے عازمین نہ صرف اپنی درخواست کی پیش رفت کو ٹریک کر سکیں گے بلکہ انہیں حج سے متعلق اہم اپ ڈیٹس بھی آن لائن مہیا ہوں گی۔
