کم عمر ڈرائیورز کیلئے لائسنس کی فیس اور شرائط سامنے آگئیں
وزیراعلیٰ پنجاب مریم نواز کے خصوصی وژن کے تحت صوبائی دارالحکومت لاہور سمیت پنجاب بھر میں نوجوانوں کو موٹرسائیکل چلانے کے لیے 18 سال کی عمر تک پہنچنے کا انتظار نہیں کرنا پڑے گا۔
پنجاب حکومت کی جانب سے 16 سے 18 سال کے نوجوانوں کے لیے قانونی طور پر ‘جووینائل ڈرائیونگ پرمٹ کی سہولت متعارف کرائی گئی ہے جس کے تحت اب 16 سال تا 18 سال کی عمر کے نوجوانوں کو قانونی شرائط پوری کرنے کے بعد سڑکوں پر موٹرسائیکل چلانے کی اجازت ہو گی۔
سی ٹی او لاہور سید عبدالرحیم شیرازی نے بتایا کہ جووینائل پرمٹ کے لیے عمر کے لحاظ سے فیس مقرر کی گئی ہے، 16 سے 17 سال کی عمر کے نوجوانوں کے لیے پرمٹ فیس ایک ہزار روپے جبکہ 17 سے 18 سال کی عمر کے نوجوانوں کے لیے فیس 500 روپے رکھی گئی ہے۔
چیف ٹریفک آفیسر لاہور نے واضح کیا کہ نوجوانوں کی حفاظت کو مدنظر رکھتے ہوئے رفتار پر سخت پابندی ہو گی اور پرمٹ ہولڈر موٹرسائیکل نوجوان 60 کلومیٹر فی گھنٹہ کی رفتار سے زیادہ تیز نہیں چلا سکیں گے۔
یہ بھی پڑھیں: کم عمر ڈرائیورز کے ڈرائیونگ لائسنس بنانے کا آغاز
ٹریفک پولیس حکام کے مطابق کم عمر ڈرائیورز کی حفاظت اور قانونی تقاضوں کو پورا کرنے کے لیے والدین یا سرپرست کی اجازت لازم ہو گی۔
سی ٹی او لاہور نے ہدایت کی کہ پرمٹ کے حصول کے لیے آنے والے نوجوان اپنے والدین یا قانونی سرپرست کو لازمی ہمراہ لائیں، اس کے علاوہ، والدین یا گارڈین کو اپنے شناختی کارڈ کی کاپی اور نوجوان کی ایک عدد پاسپورٹ سائز تصویر بھی ساتھ لانا ہو گی۔
