ٹریفک پولیس حکام کے مطابق نادر ا کے ب فارم سے لائسنس پرمٹ جاری کیا جائے گا، والد یا گھر کے سرپرست کا اجازت نامہ ڈرائیونگ پرمٹ کے لیے لازمی ہو گا جبکہ ڈرائیونگ پرمٹ کی فیس پانچ سو روپے ہو گی۔

ڈی آئی جی ٹریفک پنجاب وقاص نذیر نے کہا ہے کہ 16 سے 18 سال کے لڑکے اور لڑکیاں ٹریفک کے ڈرائیونگ سینٹر ز سے اپنے لائسنس پرمٹ حاصل کر سکیں گے، 16سال سے 18 سال کے لڑکے اس پرمٹ پر صرف موٹر سائیکل چلا سکیں گے۔

انہوں نے واضح کیا کہ مذکورہ ڈرائیونگ پرمٹ پر کار یا کمرشل گاڑی چلانے کی اجازت نہیں ہو گی۔

حکام کا کہنا ہے کہ اس اقدام کا مقصد کم عمر ڈرائیورز کو قانونی دائرے میں لانا اور ٹریفک قوانین سے آگاہی دینا ہے۔

ٹریفک پولیس کا کہنا ہے کہ اس اقدام سے سڑکوں پر کم عمر ڈرائیورز کی غیر قانونی ڈرائیونگ کی حوصلہ شکنی ہوگی اور ٹریفک نظم و ضبط میں بہتری آئے گی، شہریوں سے اپیل کی گئی ہے کہ وہ مقررہ قواعد و ضوابط پر عمل کریں اور محفوظ ڈرائیونگ کو یقینی بنائیں۔

یہ بھی پڑھیں: عدالت کا کم عمر ڈرائیورز کو گرفتار نہ کرنے کا حکم

یاد رہے کہ گزشتہ برس دسمبر میں پنجاب حکومت نے 16سال کے بچوں کو سمارٹ کارڈ اور موٹرسائیکل ڈرائیونگ لائسنس کے اجراء کا اصولی فیصلہ کیا تھا۔

وزیراعلیٰ پنجاب مریم نواز نے کہا تھا کہ کم عمر طلبہ یا بچوں سے زیادہ والدین کو ٹریفک قوانین سے متعلق بھرپور کردار ادا کرنا چاہیے ،ٹریفک قوانین عوام کی جان کی حفاظت کے لئے بنائے جاتے ہیں، عوام کو اپنی حفاظت کے لئے عادتوں کو بدلنا ہو گا۔

ان کا کہنا تھا کہ ٹریفک قوانین پر عملدرآمد یقینی بنانے کے لئے ہر شہری اپنا کردار ادا کرے، معصوم بچوں کو پکڑنا نہیں چاہتے مگرقانون کی پاسداری ضروری ہے، بچوں کا قصور نہیں ہم نے انہیں ہیلمٹ پہننے کی عادت ہی نہیں ڈالی۔