چیف جسٹس لاہور ہائیکورٹ جسٹس مس عالیہ نیلم نے کم عمر بچوں کو ٹریفک قوانین کی خلاف ورزی پر گرفتار کرنے پر سخت نوٹس لیتے ہوئے آئی جی پنجاب کو اس حوالے سے احکامات جاری کر دیے۔

چیف جسٹس لاہور ہائیکورٹ جسٹس مس عالیہ نیلم نے آئی جی پنجاب کو حکم دیا کہ کم عمر ڈرائیور بچوں سے متعلق پہلے آگاہی مہم چلائی جائے، پہلی مرتبہ کم عمر موٹر سائیکل اور گاڑی چلانے والے بچوں کو وارننگ دی جائے ، غلطی دہرانے پر قانون کے مطابق کارروائی کی جائے۔

دوسری جانب وزیراعلیٰ پنجاب مریم نواز نے بھی ٹریفک قوانین کی خلاف ورزی پر کم عمر طلبہ کوگرفتار کرنے سے روک دیا، وزیراعلیٰ پنجاب نے ٹریفک قوانین کی خلاف ورزی پر بچوں کو ہتھکڑیاں لگانے پر سخت برہمی کا اظہار کیا۔

پنجاب حکومت نے 16سال کے بچوں کو سمارٹ کارڈ اور موٹرسائیکل ڈرائیونگ لائسنس کے اجراء کا اصولی فیصلہ کر لیا، صوبہ بھر میں عوام بالخصوص طلبہ کے لئے ہفتہ آگاہی منایا جائے گا جبکہ ہیلمٹ نہ پہننے پر پہلی خلاف ورزی کی صورت میں وارننگ چالان ہو گا۔

یہ بھی پڑھیں: ٹریفک قوانین پر عملدرآمد کیلئے ڈرونز سے نگرانی شروع

پنجاب میں پہلی مرتبہ ٹریفک مانیٹرنگ کے لئے ڈرون اور باڈی کیم کا استعمال بھی شروع کردیا گیا۔

وزیراعلیٰ پنجاب مریم نواز نے کہا کہ کم عمر طلبہ یا بچوں سے زیادہ والدین کو ٹریفک قوانین سے متعلق بھرپور کردار ادا کرنا چاہیے ،ٹریفک قوانین عوام کی جان کی حفاظت کے لئے بنائے جاتے ہیں، عوام کو اپنی حفاظت کے لئے عادتوں کو بدلنا ہو گا۔

ان کا کہنا تھا کہ ٹریفک قوانین پر عملدرآمد یقینی بنانے کے لئے ہر شہری اپنا کردار ادا کرے، معصوم بچوں کو پکڑنا نہیں چاہتے مگرقانون کی پاسداری ضروری ہے، بچوں کا قصور نہیں ہم نے انہیں ہیلمٹ پہننے کی عادت ہی نہیں ڈالی۔

مریم نواز کا مزید کہنا تھا کہ والدین بچوں کو روڈسیفٹی کے لئے ہیلمٹ کی اہمیت اور ضرورت سے آگاہ کریں، ٹریفک پولیس عوام کی عزت نفس کا خصوصی خیال رکھے، بداخلاقی اور بدتمیزی نہ کی جائے۔