ملک بھر میں بارشوں کا نیا سلسلہ آج سے شروع گا

این ڈی ایم اے کے مطابق گلگت بلتستان، خیبر پختونخوا اور آزاد کشمیر میں آندھی، تیز ہواؤں اور گرج چمک کے ساتھ بارشوں کا امکان ہے۔

بارشوں کے باعث مقامی سطح پر اچانک سیلابی صورتحال پیدا ہو سکتی ہے جبکہ ندی نالوں اور برساتی آبی گزرگاہوں میں طغیانی کا بھی خدشہ ظاہر کیا گیا ہے۔

ادارے کے مطابق چترال، شانگلہ، کوہستان، بٹگرام اور مانسہرہ کے پہاڑی علاقوں میں فلیش فلڈنگ کا خطرہ موجود ہے۔ اسی طرح آزاد کشمیر کے مظفرآباد، وادی نیلم، باغ اور راولاکوٹ میں بھی شدید بارشوں کے باعث سیلابی صورتحال پیدا ہو سکتی ہے۔

گلگت بلتستان کے اضلاع غذر، دیامر، گلگت، تانگیر، داریل اور گپس یاسین میں ندی نالوں میں طغیانی کا خدشہ ظاہر کیا گیا ہے۔ این ڈی ایم اے نے خبردار کیا ہے کہ 12 سے 15 جون کے دوران گلگت بلتستان اور ملحقہ پہاڑی علاقوں میں لینڈ سلائیڈنگ کے واقعات بھی پیش آ سکتے ہیں۔

الرٹ کے مطابق قراقرم ہائی وے اور جگلوٹ اسکردو روڈ کے مختلف مقامات پر عارضی بندش اور سفری مشکلات کا امکان موجود ہے۔

یہ بھی پڑھیں:بے نظیر انکم سپورٹ کے مستحقین کیلئے خوشخبری

شہریوں کو ہدایت کی گئی ہے کہ وہ نشیبی علاقوں اور ندی نالوں کے قریب غیر ضروری قیام سے گریز کریں جبکہ سیاح شدید بارشوں کے دوران پہاڑی علاقوں کا سفر مؤخر کریں۔

دوسری جانب محکمہ موسمیات نے اسلام آباد، پنجاب، خیبر پختونخوا، سندھ اور بلوچستان کے مختلف علاقوں میں بارشوں کی پیشگوئی کی ہے۔