عید سے قبل سرکاری ملازمین کیلئے بڑی سہولت کا اعلان
وزارت خزانہ کی جانب سے جاری نوٹیفکیشن کے مطابق تمام وفاقی سرکاری ملازمین اور پنشنرز کو مئی کی تنخواہیں اور پنشن 22 مئی 2026 کو ادا کی جائیں گی۔ عام طور پر تنخواہیں اور پنشن ماہ کے آخر میں جاری کی جاتی ہیں، تاہم عیدالاضحیٰ کی آمد کے باعث حکومت نے پیشگی ادائیگی کا فیصلہ کیا ہے۔
یہ بھی پڑھیں: پی ٹی آئی ایم این اے کی سائیکل پر پارلیمنٹ آمد
حکام کے مطابق عیدالاضحیٰ 27 یا 28 مئی 2026 کو متوقع ہے، اسی لیے ملازمین اور پنشنرز کو مالی مشکلات سے بچانے کے لیے تنخواہوں اور پنشن کی جلد ادائیگی کی جائے گی۔ حکومت کا کہنا ہے کہ اس اقدام کا مقصد سرکاری ملازمین، ریٹائرڈ افراد اور ان کے اہلخانہ کو عید کی خریداری، قربانی کے انتظامات اور دیگر ضروری اخراجات کے لیے بروقت مالی سہولت فراہم کرنا ہے۔
وزارت خزانہ نے متعلقہ محکموں اور اداروں کو ہدایات جاری کر دی ہیں کہ تنخواہوں اور پنشن کی ادائیگی کے تمام انتظامات مقررہ تاریخ سے پہلے مکمل کیے جائیں۔ حکام کا کہنا ہے کہ ادائیگیوں کا عمل 22 مئی کو یقینی بنایا جائے گا تاکہ کسی بھی ملازم یا پنشنر کو تاخیر کا سامنا نہ کرنا پڑے۔
حکومتی فیصلے کو سرکاری ملازمین اور پنشنرز کے لیے اہم ریلیف قرار دیا جا رہا ہے، کیونکہ عیدالاضحیٰ کے موقع پر گھریلو اخراجات، قربانی، سفر اور خریداری کے باعث مالی دباؤ بڑھ جاتا ہے۔ ایسے میں تنخواہ اور پنشن کی پیشگی ادائیگی سے ملازمین کو اپنی ضروریات بہتر انداز میں پوری کرنے میں مدد ملے گی۔
