پی ٹی آئی ایم این اے کی سائیکل پر پارلیمنٹ آمد
پی ٹی آئی کے ایم این اے اقبال آفریدی جب سائیکل پر پارلیمنٹ ہاؤس پہنچے تو وہاں موجود میڈیا نمائندوں نے ان سے گفتگو کی۔ اقبال آفریدی کا کہنا تھا کہ پٹرول کی بڑھتی ہوئی قیمتوں نے عام آدمی کی زندگی مشکل بنا دی ہے۔ انہوں نے کہا کہ موجودہ حکومت کو عوام کی مشکلات کا کوئی احساس نہیں، حکومت صرف اپنا شارٹ فال پورا کرنے کے لیے عوام پر بوجھ ڈال رہی ہے۔
یہ بھی پڑھیں: عمران کا علاج ورنہ پارلیمنٹ نہیں چلنے دینگے: محمود خان اچکزئی
اقبال آفریدی نے حکومت کو شدید تنقید کا نشانہ بناتے ہوئے کہا کہ پٹرول، بجلی، گیس اور اشیائے خور و نوش کی قیمتوں میں اضافہ عوام کے ساتھ ظلم اور جبر کے مترادف ہے۔ ان کا کہنا تھا کہ جب پٹرول مہنگا ہوتا ہے تو اس کا اثر صرف گاڑی چلانے والوں تک محدود نہیں رہتا بلکہ ٹرانسپورٹ کرایوں، سبزیوں، دالوں، آٹے، چینی اور دیگر روزمرہ استعمال کی اشیا پر بھی پڑتا ہے۔ اس طرح مہنگائی کی ایک نئی لہر جنم لیتی ہے جس کا سب سے زیادہ نقصان غریب اور متوسط طبقے کو ہوتا ہے۔
ایم این اے اقبال افریدی آج قومی اسمبلی میں ہونے والے اجلاس کے لئے سائیکل پر روانہ۔
— Iqbal Afridi PTI (@IqbalAfridiPTI) May 11, 2026
پٹرول اور ڈیزل مہنگائی کے خلاف علامتی طور پر اپنا احتجاج ریکارڈ کروایا۔
پٹرول مہنگا وزیراعظم چور۔ pic.twitter.com/kfv2vH6HV1
پی ٹی آئی رہنما نے کہا کہ عوام پہلے ہی مہنگائی، بے روزگاری اور معاشی دباؤ کا شکار ہیں، ایسے میں پٹرولیم مصنوعات کی قیمتوں میں اضافہ ان کی مشکلات میں مزید اضافہ کرے گا۔ انہوں نے کہا کہ حکومت کو چاہیے تھا کہ عوام کو ریلیف دیتی، لیکن اس کے برعکس عام شہریوں کی جیبوں پر مزید بوجھ ڈال دیا گیا ہے۔
