میاں نواز شریف کا سیاسی محاذ پر متحرک ہونے کا فیصلہ
پارٹی ذرائع کے مطابق لیگی صدر میاں نواز شریف نے پارٹی کے سینئر رہنماؤں اور گزشتہ انتخابات میں ہارنے والے امیدوار وں سے ٹیلیفونک رابطے کیے جس میں سیاسی صورتحال پر تبادلہ خیال کیا گیا۔
ذرائع کا بتانا ہے کہ صدر مسلم لیگ ن میاں نواز شریف نے مختلف سینئر رہنماؤں کو اہم زمہ داریاں بھی تفویض کی ہیں جبکہ نواز شریف نے وفاقی کابینہ میں پارٹی کے سینئر رہنماؤں کی شمولیت کا عندیہ بھی دے دیا۔
لیگی ذرائع کا بتانا ہے کہ میاں نواز شریف آئندہ چند روز میں عمرہ ادائیگی کے لیے روانہ ہوں گے،میاں نواز شریف وطن واپسی کے بعد پارٹی رہنماؤں سے باقاعدہ ملاقاتوں کا سلسلہ بھی شروع کریں گے۔
یہ بھی پڑھیں: شہباز شریف کی محمود خان اچکزئی کو مذاکرات کی دعوت
خیال رہے کہ لندن سے واپسی کے بعد میاں نواز شریف انتخابات میں فتح کے باوجود سیاسی پس منظر میں چلے گئے ہیں اور وہ پس پردہ رہ کر ہی وفاق میں بھائی شہباز شریف اور پنجاب میں بیٹی مریم نواز کی حکومت کی معاونت کر رہے ہیں۔
تاہم اب انہوں نے ایک بار پھر سیاسی محاذ پر متحرک ہونے کا فیصلہ کیا ہے۔
