شہباز شریف کی محمود خان اچکزئی کو مذاکرات کی دعوت
تفصیلات کے مطابق وزیراعظم پاکستان شہباز چریف کی جانب سے اپوزیشن رہنما محمود خان اچکزئی کو باضابطہ ملاقات کا پیغام ارسال کیا گیا ہے۔
رپورٹس کے مطابق وزیراعظم نے محمود خان اچکزئی کو وزیراعظم ہاؤس یا وزیراعظم آفس میں ملاقات کی دعوت دی تھی، تاہم انہوں نے وہاں ملاقات سے معذرت کرتے ہوئے غیر جانبدار مقام پر ملاقات کی تجویز دی ہے تاکہ مذاکرات زیادہ شفاف ماحول میں ہو سکیں۔
ابتدائی اطلاعات کے مطابق محمود خان اچکزئی نے وفاقی وزیر رانا ثناء اللہ کی رہائشگاہ پر ملاقات کرنے پر آمادگی ظاہر کی ہے۔ اس ملاقات کو حکومت اور اپوزیشن کے درمیان سیاسی ڈیڈ لاک ختم کرنے کی ایک اہم کوشش قرار دیا جا رہا ہے۔
ذرائع کا کہنا ہے کہ حکومت اور اپوزیشن کے درمیان پیغام رسانی کا سلسلہ گزشتہ ہفتے سے جاری ہے، مجوزہ ملاقات میں ملک کی مجموعی سیاسی صورتحال کے علاوہ اہم آئینی و انتظامی معاملات پر بھی بات چیت متوقع ہے۔ ان امور میں چیف الیکشن کمشنر اور الیکشن کمیشن کے اراکین کی تقرری جیسے حساس معاملات بھی شامل ہیں۔
یہ بھی پڑھیں:لاہور سے کراچی جانیوالی ٹرینوں کے اوقات میں تبدیلی
سیاسی مبصرین کے مطابق اگر یہ مذاکرات کامیاب ہو جاتے ہیں تو ملک میں سیاسی درجہ حرارت کم ہونے اور ادارہ جاتی معاملات پر اتفاق رائے پیدا ہونے کے امکانات بڑھ سکتے ہیں۔
