پولیس کے مطابق افسوسناک واقعہ اچھرہ کے قریب شاہ جمال میں پیش آیا، واقعہ کی اطلاع ملتے ہی ریسکیو ٹیمیں اور پولیس کی بھاری نفری جائے وقوعہ پر پہنچ گئی، پولیس نے لاشوں کو تحویل میں لے کر پوسٹمارٹم کے لیے ہسپتال منتقل کر دیا۔

ذرائع کے مطابق مقتولین کی عمریں 1 سے 11 سال کے درمیان ہیں، والدین گھر کو باہر سے تالا لگا کر میڈیکل سٹور پر ادویات لینے کے لیے گئے، جب واپس گھر آئے تو بچوں کی گردنیں کٹی ہوئی تھیں۔

ریسکیو حکام کا بتانا ہے کہ مقتول بچوں کی شناخت پانچ سالہ مومتہ بتول، چار سالہ مومن رضا اور ڈیڑھ سالہ ام حبیبہ کے نام سے ہوئی ہے۔

وزیراعلیٰ پنجاب مریم نواز نے اچھرہ میں تین معصوم بچوں کے قتل پر شدید دکھ اور افسوس کا اظہار کرتے ہوئے فوری رپورٹ طلب کرلی اور معصوم بچوں کے قاتل کی فوری گرفتاری کا حکم دیا ہے۔

یہ بھی پڑھیں: فیصل آباد میں ٹریفک وارڈن کے گھر بڑی ڈکیتی

وزیراعلیٰ مریم نواز نے کہا کہ بچوں کے سفاکانہ قتل کا واقعہ انتہائی تکلیف دہ ہے ،معصوم بچوں کے قتل کے ذمہ دار قانونی کارروائی اور کڑی سزا سے نہیں بچ سکیں گے۔

دوسری جانب آئی جی پنجاب عبدالکریم نے اچھرہ میں تہرے قتل کا نوٹس لیتے ہوئے سی سی پی او لاہور سے رپورٹ طلب کر لی، آئی جی پنجاب نے ڈی آئی جی آپریشنز لاہور کو قتل میں ملوث ملزم کی فوری گرفتاری کا حکم دیتے ہوئے کہا کہ ملزم کی گرفتاری کے لئے تمام وسائل بروئے کار لائیں۔

ڈی ائی جی آپریشن لاہور فیصل کامران نے نامعلوم ملزم کو پکڑنے کے لیے ٹیمیں تشکیل دے دیں، انہوں نے کہا کہ ملزم کو جلد گرفتار کر لیا جائے گا۔