تفصیلات کے مطابق حکام نے ایران اور امریکہ کے درمیان متوقع دوسرے دور کے مذاکرات سے قبل سیکیورٹی اقدامات سخت کر دیے ہیں۔
حکام نے رینٹ اے کار اور سیاحتی ٹرانسپورٹ سروسز کو بھی معطل کر دیا ہے۔ ضلعی انتظامیہ نے ملک بھر کے ٹرانسپورٹرز کو آگاہ کرتے ہوئے ہدایت جاری کی ہے کہ آئندہ احکامات تک اسلام آباد اور راولپنڈی کے لیے ٹکٹ جاری نہ کیے جائیں۔
مزید برآں، سیکیورٹی پلان کے تحت موٹروے اور جی ٹی روڈ کے ذریعے جڑواں شہروں میں داخل ہونے والی پبلک ٹرانسپورٹ پر بھی پابندی عائد کر دی گئی ہے۔
یہ بھی پڑھیں: تیل کی عالمی قیمتوں میں بڑی کمی
حکام کے مطابق اشیائے ضروریہ کی ترسیل کو برقرار رکھنے کے لیے مال بردار ٹرانسپورٹ کو چلنے کی اجازت دی جا سکتی ہے، تاہم اس بارے میں حتمی فیصلہ زیر غور ہے۔ یہ اقدامات چیف ٹریفک آفیسر راولپنڈی کی زیر صدارت ہونے والے اجلاس میں منظور کیے گئے۔
دوسری جانب، فیصل موورز نے بھی حکومتی ہدایات کے بعد اپنی اسلام آباد سروسز عارضی طور پر معطل کرنے کا اعلان کیا ہے اور کہا ہے کہ آپریشن بحال ہونے پر مسافروں کو آگاہ کر دیا جائے گا۔
