ذرائع کے مطابق پاکستان کی ثالِثی میں فریقین نے سازگار ماحول میں بات چیت کی ، فریقین نے پاکستان کی قومی و عسکری قیادت کی ثالِثی اور سہولت کاری کو سراہا، فریقین نے ایک دوسرے سے بنیادی نکات پر گفتگو کی۔
ذرائع نے بتایا ہے کہ وقفے کے بعد فریقین کے درمیان دوبارہ بات چیت شروع ہو گئی ہے اور شق وار بات چیت کا سلسلہ جاری ہے، لبنان پر جارحیت کا نکتہ بھی بحث میں شامل ہے۔
ایرانی خبر ایجنسی تسنیم کے مطابق مذاکرات کا پہلا راؤنڈ مکمل ہونے کے بعد ایرانی اور امریکی وفود زیرِ بحث امور پر تحریری مسودوں کا تبادلہ کر رہے ہیں، دونوں ممالک کی تکنیکی ٹیمیں، جو کئی گھنٹوں سے مذاکرات میں مصروف تھیں، بات چیت کے بعد مختلف نکات کو تحریری شکل میں ایک دوسرے کے سامنے رکھ رہی ہیں۔
برطانوی خبر رساں ادارے رائٹرز نے شام کے وقت ذرائع کے حوالے سے بتایا تھا کہ فریقین کے درمیان ابتدائی اہم ترین ملاقات میں امریکی نائب صدر جے ڈی وینس، خصوصی ایلچی اسٹیو وٹکوف اور صدر ٹرمپ کے داماد جیرڈ کشنر نے ایران کی پارلیمنٹ کے اسپیکر باقر قالیباف اور وزیر خارجہ عباس عراقچی سے ملاقات کی۔
یہ بھی پڑھیں: اسلام آباد ٹاکس، وزیراعظم سے امریکی و ایرانی وفود کی ملاقاتیں
واضح رہے کہ امریکا اور ایران کے درمیان مستقل جنگ بندی خاتمے کے لیے پاکستان کی ثالِثی میں براہِ راست مذاکرات اسلام آباد کے سرینا ہوٹل میں جاری ہیں، دونوں ملک ایک دہائی بعد آمنے سامنے بیٹھ کر بات چیت کر رہے ہیں۔
ذہن نشین رہے کہ براہ راست مذاکرات سے قبل مریکی اور ایرانی وفود نے وزیراعظم پاکستان محمد شہباز شریف سے الگ الگ ملاقاتیں بھی کی تھیں۔
وزیراعظم ہاؤس کی جانب سے جاری اعلامیہ کے مطابق اسلام آباد میں آج مذاکرات کے آغاز کے موقع پر وزیرِ اعظم محمد شہباز شریف سے امریکا کے نائب صدر جے ڈی وینس نے ملاقات کی، امریکی نائب صدر کے ہمراہ خصوصی ایلچی اسٹیو وٹکوف اور جیرڈ کشنر بھی موجود تھے۔
ملاقات میں نائب وزیرِ اعظم و وزیرِ خارجہ سینیٹر محمد اسحاق ڈار اور وزیرِ داخلہ سینیٹر سید محسن رضا نقوی بھی شریک تھے۔
As the Islamabad Talks commenced today, the Prime Minister of Pakistan, Muhammad Shehbaz Sharif held a meeting with His Excellency JD Vance, Vice President of the United States of America.
— Government of Pakistan (@GovtofPakistan) April 11, 2026
The U.S. Vice President was assisted by Special Envoy Steve Witkoff and Mr. Jared Kushner.… pic.twitter.com/e67UzIPc5f
وزیرِ اعظم نے دونوں وفود کی جانب سے تعمیری انداز میں بات چیت کے عزم کو سراہتے ہوئے امید ظاہر کی کہ یہ مذاکرات خطے میں پائیدار امن کی جانب ایک اہم سنگِ میل ثابت ہوں گے۔
وزیرِ اعظم نے اس عزم کا اعادہ کیا کہ پاکستان خطے میں پائیدار امن کے لیے دونوں فریقین کے درمیان پیش رفت میں اپنی سہولت کاری کا کردار جاری رکھے گا۔
علاوہ ازیں وزیرِ اعظم محمد شہباز شریف سے ایرانی وفد نے بھی ملاقات کی، ایرانی وفد کی قیادت ایرانی مجلسِ شوریٰ کے اسپیکر محمد باقر قالیباف کر رہے تھے جبکہ ان کے ہمراہ اسلامی جمہوریہ ایران کے وزیرِ خارجہ عباس عراقچی بھی موجود تھے۔
Prime Minister Muhammad Shehbaz Sharif held a meeting with the Iranian delegation at the Islamabad Talks today.
— Government of Pakistan (@GovtofPakistan) April 11, 2026
The Iranian side was led by the Honorable Speaker of the Iranian Consultative Assembly, Mr. Mohammad Bagher Ghalibaf, assisted by Foreign Minister of the Islamic… pic.twitter.com/uUzzd6njy7
وزیرِ اعظم نے اسلام آباد مذاکرات میں ایران کی شرکت کو سراہتے ہوئے اس عزم کا اعادہ کیا کہ پاکستان خطے اور عالمی امن و استحکام کے لیے بامعنی نتائج کے حصول کی جانب پیش رفت میں سہولت کار کے طور پر اپنا کردار جاری رکھے گا۔
وزیراعظم محمد شہبازشریف کا کہنا تھا کہ پاکستان خطے اور دنیا میں امن و استحکام کے لیے بامعنی نتائج کے لیے اپنا کردار خلوصِ نیت سے جاری رکھے گا، امید ہے مذاکرات خطے میں پائیدار امن کی جانب اہم قدم ثابت ہوں گے۔
