رپورٹ کے مطابق وزیراعلیٰ سندھ کی جانب سے امدادی رقم کے اعلان پر شہریوں کا شدید ردعمل سامنے آیا جس کے بعد سسٹم بیٹھ گیا،شہریوں کے رش سے ویب سائٹ ہی کریش کر گئی اور درخواستیں جمع نہ ہو سکیں۔
رپورٹ میں بتایا گیا کہ سندھ حکومت کی جانب سے لانچ کی گئی ایپلی کیشن لانچ ہوتے ہی سرور ڈاؤن ہوگیا، محکمہ ایکسائز اینڈ ٹیکسیشن کا سسٹم رش کا بوجھ برداشت نہ کر سکا، ہزاروں صارفین کی بیک وقت رسائی کے باعث سرور جواب دے گیا اور پلے اسٹور پر موجود ایکسائز ڈیپارٹمنٹ کی ایپ بھی بیٹھ گئی ہے۔
دوسری جانب خیبرپختونخوا حکومت نے بھی فیول سبسڈی کے لیے رجسٹریشن کا آغاز کر دیا، اسکیم کے ذریعے کم آمدنی والے افراد کو پٹرول کی بڑھتی قیمتوں کے پیش نظر ماہانہ 2 ہزار 200 روپے تک کی مالی معاونت فراہم کی جائے گی۔
یہ بھی پڑھیں: پٹرول پمپس پر ڈیجیٹل فیول منیجمنٹ سسٹم نافذ کرنے کا فیصلہ
خیبرپختونخوا حکومت کی جانب سے اس اسکیم کے ذریعے موٹر سائیکل، اسکوٹر اور رکشہ مالکان کو ایندھن کے اخراجات میں ریلیف دیا جائے گا جو بڑھتی ہوئی قیمتوں سے متاثر ہو رہے ہیں۔
حکام کے مطابق اس اسکیم کا مقصد مہنگائی اور پٹرول کی غیر یقینی قیمتوں کے اثرات سے کم آمدنی والے طبقے کو بچانا ہے۔
درخواست دہندگان کو اپنی گاڑی کی ملکیت ثابت کرنے کے لیے رجسٹریشن دستاویزات پیش کرنا ہوں گی جن سے یہ ثابت ہو کہ گاڑی مکمل طور پر ان کے نام منتقل ہو چکی ہے، سبسڈی صرف انہی گاڑیوں کے لیے دستیاب ہوگی جو درخواست گزار کے نام پر رجسٹرڈ ہوں۔
