پاکستان گڈز ٹرانسپورٹ الائنس نے مال برداری کے کرایوں میں 60 فیصد تک اضافہ کرنے کا اعلان کر دیا ہے جس سے مہنگائی میں مزید شدت آنے کا خدشہ پیدا ہو گیا ہے۔
صدر پاکستان گڈز ٹرانسپورٹ الائنس ملک شہزاد کا کہنا ہے کہ پیٹرول اور ڈیزل کی قیمتوں میں حالیہ اضافہ ناقابل برداشت، حکومتی پالیسیوں پر شدید تنقید کرتے ہوئے کہا کہ ان فیصلوں سے کاروباری سرگرمیاں متاثر ہوں گی اور لاکھوں افراد کے روزگار کو خطرہ لاحق ہو سکتا ہے۔
ان کا کہنا تھا کہ اگر حکومت نے فوری طور پر نظرثانی نہ کی تو ملک میں مال برداری کا نظام مفلوج ہو سکتا ہے۔
دوسری جانب پاکستان پبلک ٹرانسپورٹ اونر ایسوسی ایشن نے بھی ڈیزل کی قیمت میں اضافے پر شدید تشویش کا اظہار کرتے ہوئے ہنگامی اجلاس طلب کر لیا ہے۔
ایسوسی ایشن کے رہنماؤں کا کہنا ہے کہ موجودہ حالات میں کرایوں میں اضافہ کیے بغیر گاڑیاں چلانا ممکن نہیں، حکومت واضح طور پر اعلان کر دے کہ ٹرانسپورٹرز اپنا کاروبار بند کر دیں۔
یہ بھی پڑھیں:حکومت کا موٹرسائیکل والوں 3 ماہ کیلئے پٹرول سبسڈی دینے کا اعلان
واضح رہے کہ حکومت نے گزشتہ روز پیٹرول اور ڈیزل کی قیمتوں میں ملکی تاریخ کا سب سے بڑا اضافہ کیا ہے، پیٹرول کی قیمت میں 137 روپے 24 پیسے فی لیٹر اضافہ کر کے نئی قیمت 458 روپے 41 پیسے مقرر کی گئی ہے جبکہ ڈیزل کی قیمت میں بھی 184 روپے 49 پیسے کا اضافہ کیا گیا ہے۔
معاشی ماہرین کا کہنا ہے کہ اس اضافے کے اثرات اشیائے ضروریہ کی قیمتوں پر بھی پڑیں گے جس سے عوام کو مزید مالی دباؤ کا سامنا کرنا پڑ سکتا ہے۔
