وزارت مذہبی امور کے مطابق پاکستان سے پہلی حج پرواز 18 اپریل کو اڑان بھرے گی، پاکستان سے سرکاری حج سکیم کے تحت 468 پروازوں کے ذریعے عازمین کو حجاز مقدس پہنچایا جائے گا ۔
وزارت کے مطابق پاکستان سے سرکاری سکیم کے تحت ایک لاکھ 19 ہزار عازمین کو مدینہ منورہ اور مکہ مکرمہ لے جایا جائے گا، سرکاری سکیم کے تحت 67 ہزار 230 مرد عازمین کو سعودی عرب پہنچایا جائے گا جبکہ سرکاری کوٹے کے تحت 51 ہزار 846 خواتین عازمین حجاز مقدس جائیں گی۔
اعلامیہ کے مطابق حج آپریشن کے پہلے روز عازمین کو چار پروازوں کے ذریعے مدینہ منورہ پہنچایا جائے گا، 18 اپریل کو کراچی، لاہور، سیالکوٹ اور ملتان سے پروازیں روانہ ہوں گی، جدہ کے لئے چار مئی سے حج پروازوں کا آغاز کیا جائے گا جبکہ مدینہ منورہ کے لیے پہلی لانگ حج پرواز سات مئی کو چلے گی اور پاکستان سے آخری حج پرواز 21 مئی کو روانہ ہو گی۔
یہ بھی پڑھیں: خانہ کعبہ میں نصب حجرِ اسود کی صفائی کیسے کی جاتی ہے؟
عازمین حج کو حجاز مقدس پہنچانے کا آپریشن 34 روز جاری رہے گا ، حج پروازوں کے آغاز پر پہلے 15 روز عازمین کو مدینہ منورہ پہنچایا جائے گا، مدینہ منورہ کے لیے 186 اور جدہ کے لیے 282 پروازیں چلائی جائیں گی،پی آئی اے، ائیر بلیو،ایئر سیال اور سعودی فضائی کمپنی حج آپریشن میں حصہ لے رہی ہیں۔
پاکستان کے آٹھ شہروں سے حج پروازیں چلائی جائیں گی، اسلام آباد سے 129،کراچی سے 124 اور لاہور سے 104 پروازیں چلیں گی، کوئٹہ سے 18 ،ملتان سے 34 اور سیالکوٹ سے 26 حج پروازیں روانہ ہوں گی، فیصل آباد سے 23 اور سکھر سے پانچ حج پروازیں عازمین کو سعودی عرب لے کر جائیں گی۔
