اماراتی حکام نے تصدیق کی ہے کہ ہفتے کی شام پیش آنے والے اس واقعے میں ہلاک ہونے والا شخص پاکستانی ڈرائیور تھا۔
میڈیا رپورٹس کے مطابق یہ واقعہ دبئی کے علاقے البرشا میں پیش آیا جہاں فضائی دفاعی نظام کی کارروائی کے دوران گرنے والے ملبے نے ایک گاڑی کو نقصان پہنچایا، اس حادثے کے نتیجے میں گاڑی میں موجود ڈرائیور موقع پر ہی دم توڑ گیا۔
اماراتی حکام کے مطابق ڈرائیور کو الرٹ پیغام موصول ہوا تھا جس میں شہریوں کو احتیاطی تدابیر اختیار کرنے اور محفوظ مقام پر منتقل ہونے کی ہدایت کی گئی تھی، تاہم مذکورہ شخص گاڑی میں ہی موجود رہا جس کے باعث وہ اس حادثے کا شکار ہو گیا۔
دبئی میڈیا آفس نے اس واقعے کی تفصیلات جاری کرتے ہوئے بتایا کہ فضائی دفاعی کارروائی کے دوران گرنے والے ملبے کے باعث ایک گاڑی کو نقصان پہنچا اور اس میں موجود ایشیائی ڈرائیور جان کی بازی ہار گیا۔
یہ بھی پڑھیں:امریکی سفارت خانے کے باہر زور دار دھماکا،زمین لرز گئی
حکام نے شہریوں کو ہدایت کی ہے کہ ہنگامی صورتحال میں جاری کیے جانے والے الرٹ پیغامات کو سنجیدگی سے لیا جائے اور فوری طور پر کسی قریبی عمارت یا محفوظ مقام میں پناہ حاصل کی جائے تاکہ جانی نقصان سے بچا جا سکے۔
واضح رہے کہ حالیہ حملوں کے دوران متحدہ عرب امارات میں دو پاکستانیوں سمیت چار افراد کے ہلاک ہونے کی اطلاعات سامنے آ چکی ہیں، جس کے بعد سکیورٹی اقدامات مزید سخت کر دیے گئے ہیں۔
