ذرائع کے مطابق ایڈیشنل آئی جی ویلفیئر اینڈ فنانس کی جانب سے جاری نوٹیفکیشن میں کہا گیا ہے کہ پولیس اہلکاروں کے نابینا بچوں کو ہر ماہ20 ہزار روپے وظیفہ دیا جائے گا۔
یہ وظیفہ حاضر سروس، ریٹائرڈ اور شہید پولیس ملازمین کے نابینا بچوں کے ساتھ ساتھ دورانِ ملازمت انتقال کرنے والے اہلکاروں کے بچوں کو بھی فراہم کیا جائے گا۔
آئی جی پنجاب راؤ عبد الکریم نے کہا کہ پولیس فورس ایک خاندان کی طرح ہے اور ملازمین کی فلاح و بہبود حکومت کی اولین ترجیح ہے۔
انہوں نے مزید بتایا کہ تھیلیسیمیا میں مبتلا بچوں کو پہلے ہی ہر ماہ 30 ہزار روپے جبکہ سیریبرل پالسی سے متاثرہ بچوں کو 20 ہزار روپے ماہانہ دیے جا رہے ہیں۔
یہ بھی پڑھیں: رمضان نگہبان پیکج کامیابی سے جاری ہے: عظمیٰ بخاری
آئی جی پنجاب نے یہ بھی کہا کہ دیگر سنگین بیماریوں میں مبتلا پولیس ملازمین کے بچوں کو بھی نمایاں مالی امداد فراہم کی جا رہی ہے۔
یہ اقدام پنجاب پولیس کے فلاحی اقدامات کا حصہ ہے جس کا مقصد پولیس ملازمین اور ان کے خاندانوں کو سہولت فراہم کرنا ہے۔
یہ بات قابل ذکر ہے کہ راؤ عبد الکریم پولیس سروس آف پاکستان کے 24ویں کامن سے تعلق رکھتے ہیں۔
اس سے قبل وہ ایڈیشنل آئی جی اسپیشل برانچ پنجاب سمیت کئی اہم عہدوں پر خدمات انجام دے چکے ہیں جن میں ایڈیشنل آئی جی پنجاب ہائی وے پٹرول، کمانڈنٹ پولیس کالج، ڈی آئی جی ٹریفک پنجاب، آر پی او گوجرانوالہ اور ڈی آئی جی ٹیلی کمیونیکیشن شامل ہیں۔
