رپورٹس کے مطابق کوئٹہ بھر میں بسنت کی تیاریوں کا عمل جوش و خروش سے جاری ہے ، بسنت فیسٹیول پر شہر میں پتنگ بازی، موسیقی اور مقامی ثقافتی سرگرمیوں کا مظاہرہ کیا جائے گا جو تمام شرکاء کے لیے ایک خوشگوار ماحول فراہم کرے گا۔
بسنت کے اعلان کے بعد شہر کی مارکیٹوں میں پتنگوں، ڈور اور بسنت سے متعلق دیگر اشیاء کی خرید و فروخت میں تیزی دیکھنے میں آرہی ہے، جس سے مقامی لوگوں میں خوشی اور جوش و خروش پایا جا رہا ہے۔
حکام کے مطابق کوئٹہ میں تین روزہ بسنت فیسٹیول 13 سے 15 فروری تک منایا جائے گا۔
مقامی دکانداروں کا کہنا ہے کہ گزشتہ چند روز میں پتنگوں کی فروخت میں نمایاں اضافہ ہوا ہے، خاص طور پر نوجوانوں میں اس تہوار کا بے حد جوش ہے۔
یہ بھی پڑھیں: لاہور کے بعد دیگر شہروں میں بھی بسنت، وزیراعلیٰ نے نوید سنا دی
ایک مقامی دکاندار نے کہا "بسنت کے حوالے سے نوجوانوں میں پایا جانے والا جوش و خروش ناقابل بیان ہے، ہر کوئی اس جشن کا بھرپور فائدہ اٹھانے کے لیے تیار ہے"۔
ایک شہری نے کہا کہ بسنت جیسے تہوار نہ صرف لوگوں کو خوشی فراہم کرتے ہیں بلکہ سماجی ہم آہنگی کو بھی فروغ دیتے ہیں۔
تاہم، بعض مقامی افراد نے حکام سے درخواست کی ہے کہ اس ایونٹ کو قانونی اور محفوظ حدود میں منایا جائے تاکہ ماضی میں ہونے والے منفی واقعات سے بچا جا سکے۔
دوسری جانب منتظمین کا کہنا ہے کہ کوئٹہ میں تین روزہ جشن ثقافت کا نیا باب کھول سکتا ہے، جو مقامی باشندوں کو روزمرہ کے چیلنجز سے نجات دے کر تہوار کی خوشیوں اور خوبصورتی کا تجربہ فراہم کرے گا۔
