وزیراعلیٰ پنجاب مریم نواز شریف نے اپنے ایک پیغام میں بسنت کے موقع پر حفاظتی ایس او پیز پر عملدرآمد یقینی بنانے پر اہل لاہور کو خراج تحسین پیش کرتے ہوئے کہا خوشی ہے کہ لاہور والو ں نے ہمارے اعتماد کی لاج رکھی، لاہور آج بہت خوش ہے،میں بھی بہت خوش ہوں۔

ان کا کہنا تھا کہ لاہور والوں نے قواعدو ضوابط پر عمل کر کے محفوظ بسنت منانے میں اہم کردار ادا کیا، خوش و خرم مگر محفوظ بسنت کا تصور پوری طرح اپنایا گیا، کھابے کھائے گئے پیچوں پر پیچ لڑائے گئے، ہوا کے جوش پر پتنگوں کی آنکھ مچولی ہوتی رہی یہی خوشی ہے۔

یہ بھی پڑھیں: مریم نواز کا بسنت تقریبات کے وقت میں توسیع کا اعلان

مریم نواز نے کہا کہ مقررہ سائزاور مقررہ پنے کے علاوہ ممنوعہ ڈور استعمال کرنے کی اطلاعات نہیں ملیں ، چھتوں پر ایس او پیز کے مطابق محفوظ بسنت منائی گئی، لاہور بھر میں دھاتی تار استعمال نہ ہونے کی وجہ سے ٹرانسفارمر بھی محفوظ رہے ، چھتوں پر اللہ تعالی کے فضل وکرم سے پیشگی اقدامات مؤثر ثابت ہوئے۔

وزیراعلیٰ پنجاب کا کہنا تھا کہ سیف بسنت کا تصور لاہور کے بعد دوسرے شہروں میں بھی اپنایا جائے گا، آج بسنت فیسٹیول کا آخری دن ہے، عوام احتیاط کا دامن نہ چھوڑیں، بسنت کے دوران لبرٹی اور اندرون شہر سمیت ہر علاقے میں 200کلینک آن ویلز اور 21فیلڈ ہسپتال بھی متعین تھے۔