پارٹی ذرائع کا بتانا ہے کہ مشال یوسفزئی کے بیانات پر ایکشن لیتے ہوئے انہیں شوکاز نوٹس جاری کیا جائے گا۔

کے پی ہاؤس اسلام آباد کے باہر میڈیا سے گفتگو کرتے ہوئے پاکستان تحریک انصاف کے چیئرمین بیرسٹرگوہر نے کہا کہ بس اب بہت ہوگیا مشال یوسفزئی کے خلاف ایکشن لیں گے، عمران خان کی بہنوں پر جملے کسنے والوں کے لیے پارٹی میں کوئی جگہ نہیں۔

بیرسٹرگوہر نے کہا کہ کیا آپ کو پورے ملک میں جملے کسنے کیلئے کوئی اور نہیں ملا سوائے بانی کے خاندان کے، میں نے بڑا واضح کہہ دیا ہےکہ بانی پی ٹی آئی کی فیملی کے خلاف بولنے والا پارٹی میں نہیں رہے گا۔

یہ بھی پڑھیں: والد سے ملاقات کی اجازت کیلئے حکومت ویزا جاری نہیں کر رہی، قاسم خان

چیئرمین پی ٹی آئی کا کہنا تھا کہ اتنی بڑی سیاسی قوت ہے، سیاسی جماعتوں میں اختلافات ہوتے رہتے ہیں، اگر میں چیئرمین ہوں تو ایک سیاسی ورکرکا بھی حق ہے کہ وہ مجھ سے اختلاف کرے۔

انہوں نے بتایا کہ آٹھ فروری کو ملک گیر شٹر ڈاؤن ہڑتال کی کال دی ہے، پورے ملک سے عوام کو احتجاج میں شامل ہونے کی درخواست کی گئی ہے، خیبرپختونخوا یا پنجاب کی تخصیص نہیں، پورے ملک میں احتجاج ریکارڈ کرائیں گے۔

بیرسٹر گوہر کا کہنا تھا کہ ہمارا 8 فروری کا احتجاج پر امن ہو گا، آٹھ فروری کا دن جمہوریت کے لیے ایک بڑا سیاہ دن ہے۔