وزیراعلیٰ پنجاب مریم نواز کی زیر صدارت اعلیٰ سطح اجلاس ہوا جس میں بسنت فیسٹیول سے متعلق اہم فیصلے کیے گئے۔

دوران اجلاس وزیراعلیٰ مریم نواز نے خطاب کرتے ہوئے کہا کہ پنجاب کے عوام کو خوشیاں لوٹانے آئی ہوں، پنجاب کے عوام سے خوشی کا ماحول چھین کر لڑائی جھگڑوں اور فتنہ فساد کے سپرد کر دیا گیا تھا، پنجاب دل والوں کا صوبہ ہے لیکن عوام کو تفریح سے دور کر دیا گیا۔

انہوں نے کہا کہ 30 سال بعد پنجاب میں ہارس اینڈ کیٹل شو شروع کیا، اس سا ل بھی منائیں گے، پنجاب میں آزادی کے ساتھ سب کو خوشی منانے کا حق حاصل ہے، یہ سب کا صوبہ ہے، عید، ہولی، کرسمس اور رمضان جس مذہب سے بھی اس کا تعلق ہوں اس کو خوشی منانے کا پورا حق ہے۔

وزیراعلیٰ پنجاب کا کہنا تھا کہ موسم بہار کی آمد کی اطلاع دینے والا بسنت کاخوبصورت تہوار 800 سال قبل شروع ہوا، بسنت پنجاب کی ثقافت اور ورثہ ہے، دنیا پنجاب کے کلچر کو بہت اہمیت دیتی ہے، پنجاب کے عوام کو بسنت کی خوشخبری دینا چاہتی ہوں۔

یہ بھی پڑھیں: ووٹ ڈالنے کی عمر 25 سال کرنے کی خبریں،حکومت کا موقف آگیا

مریم نواز نے کہا کہ 6، 7 اور 8 فروری کو پہلی مرتبہ گورنمنٹ سپانسرڈ اور آرگنائزڈ بسنت منانے جارہے ہیں، بسنت جیسے تہوار کا حادثات سے منسلک ہونا افسوسناک ہے، شہریوں کی حفاظت کے لئے جامع سیفٹی پلان بنایا گیا ہے، لاہور کو ریڈ، ییلو اور گرین زون میں تقسیم کیا گیا ہے۔

ان کا کہنا تھا کہ لاہور میں 10 لاکھ موٹرسائیکلوں پر مفت سیفٹی راڈز لگا رہے ہیں، بسنت کے تہوار کے لئے 2150 مینوفیکچر، ٹریڈرز، دکانداروں اور دیگر متعلقین کو رجسٹرڈ کیا گیا ہے، بسنت سے پہلے پتنگ بازی کرنے پر 600 سے زائد مقدمات درج اور 641 افراد گرفتار ہو چکے ہیں۔

وزیراعلیٰ نے کہا کہ غیر قانونی طور بنائی اور فروخت ہونے والی 27 ہزار سے زائد پتنگیں بھی برآمد کر لی گئی ہیں، بسنت منانے کے لئے 10ہزار سے زائد ضمانتی بانڈز لیے گئے ہیں، ہرصورت میں عوام کا تحفظ یقینی بنانے چاہتے ہیں، بسنت سیفٹی پلان عوام کو سزا دینے کیلئے نہیں بلکہ تحفظ کے لئے ہے۔

مریم نواز کا کہنا تھا کہ بسنت کے دوران ڈور کی چرخی کا استعمال ممنوع ہے، صرف پِنا استعمال کیا جا سکتا ہے، پتنگ بازی کے لئے کاٹن کے نو دھاگوں پر مشتمل ڈور ہی استعمال کی جا سکے گی، نائیلون اور دھاتی تار کی ڈور استعمال کرنے کی اجازت نہیں دی جائے گی، مقررہ ساز سے بڑی پتنگ اور گُڈا بھی اڑانے کی اجازت نہیں دی جائے گی۔

اس کو بھی پڑھیں: بسنت کے موقع پر اکٹھی 4 چھٹیوں کا امکان

وزیراعلیٰ پنجاب نے واضح کیا کہ ممنوعہ ڈور استعمال کرنے پر پانچ سال قید اور پانچ ملین روپے تک جرمانہ ہو گا، 7،6 اور 8 فروری کے علاوہ پتنگ بازی پر جرمانہ اور قید کی سزا دی جائے گی، غیر قانونی طور پر پتنگ بازی کرنے والوں کے والدین اور سرپرست ذمہ دار ہوں گے، قانونی کارروائی کریں گے۔

مریم نواز کا کہنا تھا کہ پتنگ بازی مذاق نہیں، عوام کی جان کے تحفظ کا معاملہ ہے، ریڈ زون میں سیفٹی راڈ کے ساتھ ہی بائیک کو آنے کی اجازت ہو گی، راڈ کے بغیر بائیک چلانے پر 2 ہزار روپے جرمانہ ہو گا، ہمارا مفاد نہیں صرف عوام کی حفاظت کے لئے کر رہے ہیں، ممنوعہ پتنگ بازی کے بارے میں اطلاع دینے پر انعام دیا جائے گا۔

انہوں نے کہا کہ بسنت کے موقع پر ٹریفک کیلئے خصوصی پلان بھی تیار کیا گیا ہے، 100 ٹریفک پولیس کیمپ لگائے جائیں گے، بسنت پر ستھرا پنجاب کے ورکروں کے علاوہ چار ہزار پولیس اہلکار بھی ڈیوٹی کریں گے، جہاں ڈور پھرنے کے واقعات پیش آئے ان علاقوں کو ریڈ زون قرار دیا گیا ہے۔

وزیراعلیٰ پنجاب کا کہنا تھا کہ بسنت ٹرانسپورٹ پلان کے تحت شہریوں کو فری رائیڈ کی سہولت دیں گے، 500 بسیں چلارہے ہیں، اورنج لائن، میٹرو بس، الیکٹرو بس اور فیڈر بس پر سفر مفت ہو گا، یانگو کے 6 ہزار ر کشے اور 24 روٹس پر 60 ہزار رائیڈز میسر ہوں گی، فری رائیڈ کا مقصد بائیک کے استعمال سے روکنا اور نقصان سے بچنا ہے۔

یہ بھی دیکھیں: پتنگ بازی پر پابندی برقرار، 5 سال قید ہوگی

مریم نواز نے کہا کہ سیف سٹی اور کمشنرآفس میں خصوصی کنٹرول روم قائم کیے گئے ہیں جہاں 24/7 ہائی الرٹ ہو گا، سی سی ٹی وی کیمروں اور ڈرون کے ذریعے تین روزہ بسنت میں مانیٹرنگ کی جائے گی، بسنت پر پولیس، فائربریگیڈ، ایمبولینس اور ہیلتھ پلان بھی تشکیل دیا گیا ہے۔

وزیراعلیٰ پنجاب کا مزید کہنا تھا کہ عوام سے ڈس انفارمیشن یا افواہوں پر کان نا دھرنے کی اپیل کرتی ہوں، بسنت عوام کی تفریح اورخوشی کیلئے ہے،ذہنی سکون کے ساتھ بسنت منائیں، 6 فروری کی رات بسنت فیسٹیول کی لانچنگ کی جائے گی اور 7 فروری کو باقاعدہ آغاز ہو گا۔