رویتِ ہلال ریسرچ کونسل کی جانب سے پیش گوئی کی گئی ہے کہ پاکستان میں پیر 19 جنوری 2026ء کی شام شعبان المعظم کا چاند نظر آنے کا کوئی امکان نہیں ہے جس کے باعث ملک میں شعبان المعظم 1447ھ کا آغاز 21 جنوری 2026ء بروز بدھ سے ہو گا۔

سیکرٹری جنرل رویتِ ہلال ریسرچ کونسل خالد اعجاز مفتی نے کہا ہے کہ پاکستان میں نئے چاند کی پیدائش اتوار 18 اور پیر 19 جنوری 2026ء کی درمیانی شب پاکستانی وقت کے مطابق رات 12 بج کر 52 منٹ پر ہو گی۔

یہ بھی پڑھیں: موسم سرما کی چھٹیاں ختم، کل سے تعلیمی سرگرمیوں کا آغاز

ان کا کہنا تھا کہ 19 جنوری بروز پیر کی شام غروبِ آفتاب کے وقت چاند کی عمر پاکستان کے تمام علاقوں میں 18 گھنٹوں سے کم ہوگی جبکہ ہلال کی رویت کے لیے چاند کی عمر کم از کم 19 گھنٹے ہونا لازمی ہے۔

سیکرٹری جنرل کا کہنا تھا کہ غروبِ آفتاب اور غروبِ قمر کے درمیان فرق بھی مطلوبہ معیار پر پورا نہیں اترے گا، گلگت اور مظفر آباد میں یہ فرق 29 منٹ، پشاور، اسلام آباد، لاہور اور چارسدہ میں 30 منٹ، کوئٹہ میں 31 منٹ جبکہ کراچی اور جیوانی میں 33 منٹ ہوگا جبکہ رویت کے لیے کم از کم 40 منٹ کا فرق ضروری تصور کیا جاتا ہے۔

اس کو بھی پڑھیں: عازمین حج 2026 کیلئے تربیتی سیشنز کا شیڈول جاری

رویتِ ہلال ریسرچ کونسل کے مطابق ان سائنسی بنیاد وں پر مطلع صاف ہونے کی صورت میں بھی 19 جنوری 2026ء بروز پیر کی شام کھلی آنکھ ، نہ دوربین اور نہ ہی ٹیلی اسکوپ کے ذریعے چاند دکھائی دینے کا کوئی امکان ہے۔

اس طرح رجب المرجب کے 30 دن مکمل ہونے کے بعد پاکستان میں شعبان المعظم 1447ھ کا آغاز بدھ 21 جنوری 2026ء سے ہوگا۔

واضع رہے کہ شعبان المعظم کی رویت کا شرعی اعلان مرکزی رویت ہلال کونسل کی جانب سے کیا جائے گا۔