پاک فوج کے شعبہ تعلقات عامہ آئی ایس پی آر کے مطابق سکیورٹی فورسز نے بلوچستان کے ضلع قلات میں خفیہ اطلاعات کی بنیاد پر آپریشن کیا جس کے دوران بھارتی پراکسی فتنہ الہندوستان سے تعلق رکھنے والے دہشت گردوں کے ٹھکانے کو مؤثر طور پر نشانہ بنایا گیا۔

آئی ایس پی آر کی جانب سے بتایا گیا کہ شدید فائرنگ کے تبادلے میں بھارتی سرپرستی میں سرگرم چار دہشت گرد ہلاک کر دیے گئے، دہشت گردوں کے قبضے سے اسلحہ اور گولہ بارود بھی برآمد کر لیا گیا۔

یہ بھی پڑھیں: سیکیورٹی فورسز کی کارروائیاں، 11 خوارج ہلاک

آئی ایس پی آر کے مطابق ہلاک دہشت گرد علاقے میں متعدد دہشت گرد انہ کارروائیوں میں ملوث رہے، علاقے میں کسی بھی مزید بھارتی سرپرستی میں سرگرم دہشت گرد کے خاتمے کے لیے کلیئرنس آپریشن جاری ہے۔

ترجمان پاک فوج نے کہا کہ عزمِ استحکام کے ویژن کے تحت سکیورٹی فورسز اور قانون نافذ کرنے والے اداروں کی انسدادِ دہشت گردی مہم پوری رفتار سے جاری رہے گی۔

اس کو بھی پڑھیں: ٹانک، پولیس وین پر حملہ، ایس ایچ او سمیت 6 اہلکار شہید

دوسری جانب وزیراعظم محمد شہباز شریف نے بلوچستان کے ضلع قلات میں فتنہ الہندوستان کے دہشت گردوں کے خلاف کامیاب کارروائی پر سکیورٹی فورسز کو خراج تحسین پیش کیا اور آپریشن میں فتنہ الہندوستان کے 4 دہشت گردوں کو ہلاک کرنے پر سکیورٹی فورسز کی پذیرائی کی۔

وزیراعظم محمد شہباز شریف کا کہنا تھا کہ عزم استحکام کے ویژن کے تحت سکیورٹی فورسز دہشت گردی کے خلاف بڑی کامیابیاں حاصل کر رہی ہیں ، پوری قوم دہشت گردی کے خلاف اس جنگ میں پاکستان کی افواج کے ساتھ کھڑی ہے ، ملک سے ہر قسم کی دہشت گردی کے مکمل خاتمے کے لئے پر عزم ہیں۔