کمشنر حیدرآباد فیاض حسین عباسی نے ضلع بھر میں دفعہ 144 نافذ کرتے ہوئے پتنگ بازی پر مکمل پابندی عائد کر دی۔

نوٹیفکیشن میں کہا گیا ہے کہ یکم جنوری سے 31 مارچ تک عوامی و نجی مقامات پر پتنگ اُڑانے، پتنگ اور ڈور کی خرید و فروخت، تیاری اور ذخیرہ اندوزی پر مکمل پابندی ہو گی، پتنگ بازی سے متعلق کسی بھی قسم کی سرگرمی یا اجتماع کی اجازت نہیں ہوگی۔

کمشنر حیدرآباد کی جانب سے جاری کردہ نوٹیفکیشن میں کہا گیا کہ خلاف ورزی کی صورت میں متعلقہ تھانے کا انسپکٹر دفعہ 188 پی پی سی کے تحت کارروائی کا مجاز ہو گا، پابندی شہر میں پتنگ بازی کے باعث بڑھتے حادثات کے سبب عائد کی گئی ہے۔

یہ بھی پڑھیں: پنجاب حکومت کا لاہور میں بسنت کی تاریخ کا اعلان

دوسری جانب پنجاب حکومت نے بھی پتنگ بازی کے باعث سامنے آنے والے حادثات کے تناظر میں بسنت سے پہلے پتنگ بازی کی روک تھام یقینی بنانے کے لیے کمشنرز، ڈپٹی کمشنرز، آر پی اوز، سی پی اوز اور ڈی پی اوز کو مراسلہ ارسال کر دیا۔

محکمہ داخلہ کے مطابق صوبہ بھر میں کائٹ فلائنگ ریگولیشنز بل 2025 کے تحت پتنگ سازی، پتنگ فروخت اور پتنگ بازی پر مکمل پابندی عائد ہے۔

حکومت پنجاب نے بعض علاقوں میں غیر قانونی پتنگ بازی کے بڑھتے ہوئے واقعات پر شدید تشویش کا اظہار کیا، مراسلے میں واضح کیا گیا کہ صوبائی کابینہ نے قانون کے مطابق صرف 6، 7 اور 8 فروری کو لاہور میں محدود پیمانے پر بسنت منانے کی اجازت دی ہے، تاہم مقررہ تاریخوں اور اجازت کے بغیر کسی بھی مقام پر پتنگ سازی یا پتنگ بازی غیر قانونی تصور ہوگی۔

اس کو بھی پڑھیں: پنجاب، بسنت 2026 کا با ضابطہ نوٹیفکیشن جاری

مراسلے میں کہا گیا کہ غیر قانونی پتنگ بازی انسانی جانوں اور عوامی تحفظ کیلئے سنگین خطرہ بن چکی ہے، پتنگ بازی کے دوران دھاتی، تندی اور مانجھا لگی ڈور کے باعث راہگیروں اور موٹر سائیکل سواروں کے زخمی ہونے کے متعدد واقعات رپورٹ ہو چکے ہیں، جو انتہائی تشویشناک ہیں۔

محکمہ داخلہ نے واضح کیا کہ انسانی جانوں کا تحفظ حکومت پنجاب کی اولین ترجیح ہے اور کسی صورت ایسے عمل کی اجازت نہیں دی جا سکتی جو شہریوں کی زندگیوں کیلئے خطرہ بنے۔

محکمہ داخلہ کے مطابق جشنِ بہاراں کے موقع پر ثقافتی سرگرمی کے طور پر صرف محفوظ بسنت کی اجازت دی گئی ہے، تاہم اس دوران بھی دھاتی ڈور، تندی یا کسی بھی قسم کی خطرناک ڈور کے استعمال پر مکمل پابندی برقرار رہے گی، خلاف ورزی کی صورت میں سخت قانونی کارروائی عمل میں لائی جائے گی۔

یہ بھی دیکھیں: پتنگ بازی سے متعلق پنجاب حکومت کا بڑا فیصلہ

مراسلے میں مزید کہا گیا کہ بغیر اجازت پتنگ بازی یا فروخت میں ملوث افراد کو بھاری جرمانے اور طویل قید کی سزا دی جائے گی، پتنگ بنانے والوں، سامان فراہم کرنے والوں اور پتنگ بازی میں ملوث تمام افراد کی گرفتاری یقینی بنائی جائے۔

تمام کارروائیاں کائٹ فلائنگ ریگولیشنز بل 2025 کے مطابق کی جائیں گی اور تمام اضلاع اپنی کارروائیوں کی رپورٹ محکمہ داخلہ پنجاب کو ارسال کرنے کے پابند ہوں گے۔