تفصیلات کے مطابق ڈپٹی کمشنر لاہور سید موسیٰ رضا نے بسنت 2026 کا باضابطہ نوٹیفکیشن جاری کیا۔ ضلعی انتظامیہ، پولیس، کائٹ فلائنگ ایسوسی ایشنز اور شہریوں کیلئے ایس او پیز جاری کر دیئے گئے۔ حکومت نے سخت شرائط اور حفاظتی اقدامات کے تحت پتنگ بازی کی مشروط اجازت دی۔

پتنگ اور ڈور مینوفیکچررز کی رجسٹریشن کیلئے ای بز ایپ اور آن لائن پورٹل فعال کر دیا گیا۔ پتنگ بازی کا سامان فروخت کرنے کیلئے یکم تا 8 فروری 2026 کا وقت مقرر کیا گیا ہے۔ چرخیاں بنانے اور بیچنے پر مکمل پابندی، ڈور صرف 'پنا' کی شکل میں ہوگی۔

یہ بھی پڑھیں: بسنت کی صرف 3 دن کیلئے اجازت ہوگی، عظمی بخاری

ہدایت نامہ میں کہا گیا کہ نائلون، پلاسٹک اور دھاتی تار کے استعمال پر زیرو ٹالرنس پالیسی اپنائی جائے، تمام مینوفیکچررز اور سیلرز اپنی ڈیجیٹل رجسٹریشن کا عمل مکمل کریں، موٹر سائیکل سواروں کیلئے بائیک پر حفاظتی تار  لگوانا لازمی قرار دیا گیا۔ پتنگ اور گڈے کا سائز مقررہ حد سے تجاوز نہ کرے، خلاف ورزی پر کارروائی ہوگی۔ پولیس اور ضلعی افسران ممنوعہ ڈور بیچنے والوں کے خلاف سخت کریک ڈاؤن کریں، پتنگ بازی صرف 6، 7 اور 8 فروری کو کی جائے گی۔

ڈپٹی کمشنر لاہور سید موسیٰ رضا کا کہنا تھا بسنت لاہور کا ثقافتی تہوار ہے، اسے محفوظ بنانا ہماری ذمہ داری ہے، خونی ڈور اور کیمیکل کوٹنگ کسی صورت برداشت نہیں کی جائے گی، کاروباری حضرات 30 دسمبر سے قانونی طریقے سے کاروبار شروع کر سکتے ہیں، انسانی جانوں کا تحفظ ہماری اولین ترجیح ہے، کوتاہی نہیں برتیں گے۔

سید موسیٰ رضا نے کہا کہ والدین اپنے بچوں کو ممنوعہ ڈور کے استعمال سے روکیں، قانون کی پاسداری کرنے والے شہریوں کو مکمل تحفظ فراہم کریں گے۔