ترجمان موٹروے سنٹرل ریجن سید عمران احمد نے بتایا ہے کہ لاہور سیالکوٹ موٹروے ایم 11 کو دھند کی وجہ سے ٹریفک کے لیے بند کر دیا گیا ہے، موٹرویز کی بندش کا مقصد عوام کی جان و مال کا تحفظ ہے، دھند میں لین لائن کی خلاف ورزی خطرناک حادثات کا باعث بن سکتی ہے۔

انہوں نے کہا کہ روڈ یوزرز لین ڈسپلن پر سختی سے عمل کریں، شہری دن کے اوقات میں سفر کو ترجیح دیں، دھند میں صبح 10 سے شام 6 بجے تک محفوظ سفری اوقات ہیں، دھند کے اوقات میں غیر ضروری سفر سے اجتناب کریں۔

ترجمان موٹروے کا مزید کہنا تھا کہ ڈرائیور حضرات دوران سفر فوگ لائٹس لازمی استعمال کریں، تیز رفتاری نہ کریں اور آگے والی گاڑی سے محفوظ فاصلہ رکھیں،کسی بھی رہنمائی اور مدد کے لیے موٹروے پولیس کی ہیلپ لائن 130 پر رابطہ کریں۔

یہ بھی پڑھیں: دھند کے باعث حدِ نگاہ صفر، موٹرویز بند

دوسری جانب سیالکوٹ انٹرنیشنل ائیرپورٹ اور اطراف میں دھند نے ڈیرے ڈال لیے۔

ترجمان سیالکوٹ انٹرنیشنل ایئرپورٹ کے مطابق آج شام کو دھند کی شدت میں اضافہ ہوا، حد نگاہ انتہائی کم ہونے کے باعث تمام فلائٹ آپریشن اور شیڈول جزوی طور پر متاثر ہے۔

ایئرپورٹ ترجمان کا کہنا تھا کہ سیالکوٹ انٹرنیشنل ایئرپورٹ پر پروازوں کی محفوظ آمدورفت کیلئے حد نگاہ کم سے کم 500 میٹر تک درکار ہوتی ہے، تاحال حد نگاہ 100 میٹر ہے، دھند کی شدت میں کمی ہوتے ہی تمام فضائی آپریشن شیڈول کے مطابق چلے گا۔

انہوں نے کہا کہ ائیرپورٹ انتظامیہ تمام ائیرلائنز کے ساتھ رابطے میں ہے، مسافروں سے گزارش ہے کہ وہ اپنی پرواز بارے تفصیلات ائیرلائن سے حاصل کریں۔