وزیراعلیٰ خیبر پختونخوا محمد سہیل آفریدی نے سنٹرل جیل پشاور کا تفصیلی دورہ کیا اور جیل میں قائم میڈیکل وارڈ اور ای وزٹ سسٹم کا معائنہ کیا، وزیراعلیٰ نے قیدیوں سے ملاقات کی، مسائل سنے اور موقع پر فوری احکامات جاری کیے۔
دورے کے دوران وزیراعلیٰ سہیل آفریدی نے سنٹرل جیل پشاور میں جدید سکیورٹی سسٹم کا افتتاح کیا، منصوبہ 44 کروڑ روپے کی خطیر لاگت سے مکمل کیا گیا، وزیراعلیٰ نے منشیات کے عادی قیدیوں کی بحالی کے مرکز اور ماڈل انٹرویو روم کا بھی افتتاح کر دیا۔
وزیر اعلیٰ سہیل آفریدی نے صوبے کی جیلوں میں قیدیوں کی سزا میں دو ماہ کی خصوصی معافی کا اعلان کرتے ہوئے کہا کہ صوبہ بھر کی جیلوں میں جرمانوں کی عدم ادائیگی کے باعث قید افراد کے جرمانے صوبائی حکومت ادا کرے گی۔
وزیر اعلیٰ نے سنٹرل جیل پشاور میں قیدیوں کی سہولیات بہتر بنانے کے لیے دو کروڑ روپے کے فنڈ کا اعلان کیا اور قیدیوں کی شکایات کے فوری ازالے کے لیے ڈیجیٹل کمپلینٹ سیل قائم کرنے کی بھی ہدایت کی، وزیر اعلیٰ نے صوبے کے تمام جیلوں کی سولرائزیشن کا بھی اعلان کیا۔
یہ بھی پڑھیں: وزیراعلیٰ کے پی نے شہدا کے ورثا کی امدادی رقم بڑھا دی
محمد سہیل آفریدی نے خیبر پختونخوا کی جیلوں میں قیدیوں کے لیے فیملی کوارٹرز میں مزید بہتری ، دیگر صوبوں میں قید خیبر پختونخوا کے قیدیوں کو اپنے صوبے منتقل کرنے کے لیے متعلقہ صوبوں کو خط ارسال کرنے اور قیدیوں کے مسائل سننے کے لیے آئندہ ہفتے کھلی کچہری منعقد کرنے ،پیرول اینڈ پروبیشن ایکٹ 2022 پر مؤثر اور سختی سے عملدرآمد کی ہدایت کی۔
وزیراعلیٰ سہیل آفریدی کا کہنا تھا کہ جیل میں ہسپتال، کم عمر لڑکوں اور خواتین کے لیے علیحدہ خصوصی سیلز قائم کیے جائیں گے ، جنوری میں سنٹرل جیل کا دوبارہ دورہ کروں گا تمام جائز مطالبات حل ہونے چاہئیں، جیل کا مقصد سزا نہیں بلکہ اصلاح ہے تاکہ قیدی یہاں سے بہتر اور مفید شہری بن کر نکلیں۔
انہوں نے کہا کہ ہماری حکومت انسانوں پر سرمایہ کاری کر رہی ہے، ادارے مضبوط اور اصلاحی بنائیں گے، جب بھی سولہ دسمبر آتا ہے، سانحہ اے پی ایس پوری قوم کے غم تازہ کر دیتا ہے ، سانحہ اے پی ایس ملک و قوم کی تاریخ کا ایک دلخراش سانحہ ہے۔
