وزیراعلیٰ پنجاب مریم نواز کی زیر صدارت صوبے میں امن و امان کے حوالے سے جائزہ اجلاس ہوا جس میں اہم فیصلے کیے گئے۔

وزیراعلیٰ مریم نواز نے تمام سکولوں اور تعلیمی اداروں کے باہر ڈیجیٹل نگرانی کے لیے کیمرے نصب کرنے کا حکم دے دیا جبکہ پنجاب پولیس کو سکول ایجوکیشن اتھارٹی کے ساتھ مل کر تعلیمی اداروں میں فرضی مشقیں کرانے کی بھی ہدایت کی۔

پنجاب حکومت نے تمام تعلیمی اداروں کے لئے سکیورٹی گارڈ، انٹری چیکنگ اور سی سی ٹی وی لازمی قرار دے دیے۔

صوبائی حکومت نے پنجاب میں دوسروں صوبوں سے آنے اور جانے والی بسوں کے ڈرائیورز اور عملے کی رجسٹریشن کا بھی فیصلہ کیا ہے، وزیراعلیٰ نے پولیس اور قانون نافذ کرنے والے اداروں کو موٹروے پولیس سے سکیورٹی کے لئے اشتراک کار کی ہدایت کردی۔

یہ بھی پڑھیں: پنجاب کے تعلیمی اداروں کیلئے سخت سکیورٹی احکامات جاری

وزیراعلیٰ مریم نواز نے پنجاب بھر کے پارکس میں ڈیجیٹل مانیٹرنگ اور سکیورٹی بہتر بنانے اور سیف سٹی اتھارٹی کو صوبہ بھر میں کیمروں کا ری ویو کرنے کی ہدایت کی، انہوں نے لاہور سمیت پنجاب کے ہر شہر میں سی سی ٹی وی کیمروں کی کوریج یقینی بنانے کی ہدایت کی۔

مریم نواز نے گھروں اور مارکیٹوں میں لگے ہوئے سی سی ٹی وی کیمروں کوسیف سٹی سے منسلک کرنے اور سماج دشمن عناصر کی بروقت نشاندہی کیلئے کومبنگ آپریشن مسلسل جاری رکھنے کا حکم بھی دیا۔

پنجاب حکومت نے غیر قانونی افغانوں کے خلاف کارروائی مؤثر بنانے کیلئے پنجاب میں مقیم دوسرے صوبوں کے شہریوں سے رابطوں کا فیصلہ کیا ہے، وزیراعلیٰ مریم نواز نے ڈی سیز او ر ڈی پی اوز کو متعلقہ علاقوں میں عمائدین سے رابطہ کرنے کی ہدایت کی۔

پنجاب میں مقیم دوسرے صوبوں کے شہریوں کی سہولت اورآسانی کیلئے کمپیوٹرائزڈ ریکارڈ مرتب کیاجائے گا،دوسرے صوبوں کے شہریوں کا کمپیوٹرائزڈریکارڈ مرتب کرنے کا مقصد غیر قانونی افغانوں کے درمیان فرق واضح کرنا ہے۔

اس کو بھی پڑھیں: پیدا ہونے والے بچوں کی رجسٹریشن اب نادرا فوری کرے گا

وزیراعلیٰ مریم نواز نے کہا کہ پنجاب میں کوئی نمایاں عوامی مقام ڈیجیٹل مانیٹرنگ کی نگرانی سے خالی نہ ہو، پنجاب کو محفوظ ترین صوبہ بنانے تک چین سے نہیں بیٹھوں گی،پنجاب کو محفوظ ترین بنانے کے لئے شہریوں کی بھی بھرپور معاونت کی ضرورت ہے۔

انہوں نے اپیل کی کہ شہری اپنے ارد گرد مشکوک، مشتبہ افراد اور سرگرمیوں پر نظر رکھیں ، کسی بھی مشکوک سرگرمی کی صورت میں پولیس ہیلپ لائن 15 پر فوری اطلاع دیں۔

وزیراعلیٰ مریم نواز نے پنجاب میں امن وامان کی مجموعی صورتحال پر اظہار اطمینان کیا اور پولیس اور قانون نافذ کرنے والوں اداروں کو مشنری جذبے سے کام جاری رکھنے کی ہدایت کی۔