میڈیا سے گفتگو کرتے ہوئے محسن نقوی نے اعلان کیا کہ ملک بھر کے اسٹیڈیمز میں ہر ویک اینڈ پر میوزیکل کنسرٹس منعقد کیے جائیں گے جو اپریل میں پاکستان سپر لیگ 2026 (پی ایس ایل 11) کے آغاز تک جاری رہیں گے۔

محسن نقوی نے کہا ہے کہ 15 دسمبر سے لے کر پی ایس ایل 11 کے آغاز تک ہم اسٹیڈیمز میں ہر ویک اینڈ پر میوزیکل کنسرٹس کروائیں گے اور اس بات پر زور دیا کہ بورڈ اسٹیڈیمز کو صرف میچ کے دنوں تک محدود رکھنے کے بجائے انہیں پُررونق تفریحی مقامات میں تبدیل کرنا چاہتا ہے۔

چیئرمین کے مطابق اس اقدام کا مقصد اسٹیڈیم کے بنیادی ڈھانچے کا بہتر استعمال کرنا اور شائقین کو اس وقت بھی مصروف رکھنا ہے جب کرکٹ نہیں ہو رہی۔

پی سی بی کو امید ہے کہ یہ کنسرٹس بڑی تعداد میں شائقین کی توجہ کا مرکز بنیں گے، آمدنی پیدا کریں گے اور پی ایس ایل 11 سے قبل ایک فیسٹیول جیسا ماحول پیدا کریں گے۔ فنکاروں، مقامات، اور ٹکٹنگ کے بارے میں مزید تفصیلات کا اعلان آنے والے ہفتوں میں کیا جائے گا۔

یہ بھی پڑھیں: پنجاب پھر میں ٹرانسپورٹرز کی پہیہ جام ہڑتال

اس سے قبل پی سی بی چیئرمین نے چند مقامی اسٹیڈیمز کو اپگریڈ کرنے کے منصوبوں کا بھی خاکہ پیش کیا تھا جنہوں نے کبھی بین الاقوامی یا پی ایس ایل میچز کی میزبانی نہیں کی۔ پی سی بی کا ماننا ہے کہ ان اپگریڈز سے خطے میں کرکٹ کو فروغ ملے گا اور ان گراؤنڈز کے ٹاپ لیول ایونٹس کی میزبانی کے امکانات بڑھیں گے۔

ان تزئین و آرائش کے ساتھ ساتھ انہوں نے یہ بھی اعلان کیا کہ اسلام آباد کو اگلے سال تک ایک نیا بین الاقوامی معیار کا اسٹیڈیم ملے گا جبکہ کراچی کا نیشنل بینک اسٹیڈیم 2026 میں پی ایس ایل 11 کے بعد اپنی طویل تاخیر شدہ مرمت اور اپگریڈیشن سے گزرے گا۔