وزیر اعلیٰ پنجاب مریم نواز کی زیر صدارت لاہور ڈویلپمنٹ فیز ٹو سے متعلق خصوصی اجلاس ہوا جس میں وزیراعلیٰ کو لاہور ڈویلپمنٹ پلان فیز ٹو بارے تفصیلی بریفنگ دی گئی۔
اجلاس میں لاہور کا ہر محلہ روشن اور آباد بنانے کے لیے مرحلہ وار ماہانہ ورک پلان پیش کیا گیا، وزیراعلیٰ مریم نواز نے اس حوالے سے ضروری ہدایات دیں۔
لاہور ڈویلپمنٹ پلان کے دوسرے مرحلے سے شہر میں ترقی کا نیا دور شروع ہو گا، منصوبے کے مطابق لاہور شہر کی 6 ہزار 284 گلیوں کی مکمل اپ گریڈیشن کی جائے گی۔
پروگرام کے تحت آئندہ سال 30 جون تک لاہور میونسپل کارپوریشن کی 5 ہزار 798 اور واسا کی 486 گلیوں کو جدید اور قابل فخر بنایا جائے گا۔
یہ بھی پڑھیں: محفوظ پنجاب کا منصوبہ، ہر شہری کا موبائل سیف سٹی کیمرہ
وزیراعلیٰ پنجاب مریم نواز نے اجلاس کے دوران گفتگو کرتے ہوئے کہا کہ لاہور کی ترقی میں معیار پر کوئی سمجھوتہ نہیں ہو گا، لاہور ڈویلپمنٹ پلان فیز ٹو کی تکمیل میں کسی قسم کی تاخیر برداشت نہیں کی جائے گی۔
مریم نواز کا مزید کہنا تھا کہ لاہور کے ہر کونے کو اب ٹوٹ پھوٹ سے آزاد اور شہریوں کے لیے باعزت بنایا جائے گا، 6 ہزار سے زائد گلیوں کی اپ گریڈیشن کے ساتھ لاہور کا ہر محلہ رہائش کے لیے فخر کی علامت بنے گا۔
