ذرائع کے مطابق پی آئی اے نے بنگلہ دیش کی بمان ایئر لائنز کے ساتھ ایک اہم کارگو انٹرلائن اسپیشل پروریٹ معاہدہ کیا ہے ، یہ توسیع شدہ معاہدہ یکم دسمبر 2025 سے نافذ العمل ہو گا، معاہدے کا بنیادی مقصد دونوں ممالک کے درمیان فضائی کارگو کی نقل و حرکت کو ہموار بنانا ہے۔

ذرائع کا بتانا ہے کہ اس معاہدے کی رو سے سعودی عرب کے اہم شہروں، جدہ، مدینہ اور ریاض کو ٹرانزٹ گیٹ ویز کے طور پر استعمال کیا جائے گا، یہ شراکت داری علاقائی تجارت کے لیے ایک اسٹریٹجک کوریڈور قائم کرے گی جو دونوں برادر ممالک کی معیشتوں کو مؤثر طریقے سے جوڑے گی۔

یہ بھی پڑھیں: ای۔ ٹیکسی اسکیم کی قرعہ اندازی کی تاریخ کا اعلان

پی آئی اے ذرائع کا کہنا ہے کہ معاہدے کی بدولت ٹیکسٹائل، فارماسیوٹیکلز اور زرعی مصنوعات جیسی قیمتی اشیاء کی ترسیل میں موجود لاجسٹک پیچیدگیاں کم ہو جائیں گی، دونوں قومی کیریئرز کے وسیع نیٹ ورکس کے ذریعے معیاری اور کم لاگت پر مشتمل کارگو حل فراہم کیے جائیں گے۔

ذرائع کی جانب سے مزید بتایا گیا کہ اس اقدام سے باہمی تجارتی تعلقات مضبوط ہوں گے جبکہ تجارتی حجم میں بھی خاطر خواہ اضافہ ہو گا۔

ترجمان نے کہا کہ پی آئی اے پاکستانی برآمد کنندگان اور درآمد کنندگان کو خطے میں سب سے زیادہ مؤثر کارگو خدمات تک رسائی فراہم کرنے کے لیے پرعزم ہیں۔