چیئرمین پاکستان تحریک انصاف (پی ٹی آئی ) بیرسٹر گوہر نے منحرف اراکین کی پارٹی سے برطرفی کا نوٹیفکیشن جاری کیا ہے۔

نوٹیفکیشن کے مطابق 26ویں آئینی ترمیم کے حق میں ووٹ ڈالنے اور پارٹی ہدایات کی خلاف ورزی پر 5ارکان قومی اسمبلی کو پارٹی سے برطرف کردیا گیا ہے۔

نوٹیفکیشن میں بتایا گیا کہ اورنگزیب کھچی اور مبارک زیب خان کو پی ٹی آئی سے نکال دیاگیا ہے، عثمان علی،ظہور قریشی اور الیاس چودھری بھی پارٹی سے نکالنے جانے والوں میں شامل ہیں۔

یہ بھی پڑھیں: احتجاجی تحریک، پی ٹی آئی رہنماؤں میں اختلافات سامنے آنے لگے

چیئرمین پی ٹی آئی کی جانب سے جاری نوٹیفکیشن میں کہا گیا کہ منحرف اراکین نے 21 اکتوبر 2024 کو ترمیم کے حق میں ووٹ دیا ، منحرف اراکین نے پارٹی وفاداری اور حلف کی سنگین خلاف ورزی کی جس پر انہیں شوکاز نوٹس بھی جاری کیا گیا تھا۔

نوٹیفکیشن میں کہا گیا کہ پارٹی قیادت کی ہدایت پر عمل نہ کرنے اور شوکاز نوٹس پر جواب نہ دینے پر ان اراکین کے خلاف کارروائی عمل میں لائی گئی ہے۔

نوٹیفکیشن میں ان اراکین کو کسی بھی دوسری جماعت میں شمولیت پر نااہلی کے بھی مستحق قرار دیتے ہوئے مطالبہ کیا گیا ہے کہ ان اراکین کی قومی اسمبلی کی رکنیت ختم کر کے نااہل قرار دیا جائے۔