اجلاس میں سینئر ممبر بورڈ آف ریونیو، بلدیات، صحت اور متعلقہ محکموں کے سیکرٹریز نے شرکت کی جبکہ تمام ڈپٹی کمشنرز ویڈیو لنک کے ذریعے شریک ہوئے۔ ڈائریکٹر جنرل پی ڈی یم اے نے اجلاس کو تفصیلی بریفنگ دی۔
ڈائریکٹر جنرل پی ڈی یم اے نے بریفنگ میں بتایا گیا کہ موسم کی صورتحال، دریاؤں میں پانی کے بہاؤ کی 24 گھنٹے مانیٹرنگ کی جا رہی ہے، تمام اضلاع میں متعلقہ محکموں کے اشتراک سے موک ایکسرسائز مکمل کر لی گئی ہیں، اضلاع کو ضرورت کے مطابق ٹینٹ، کشتیاں، لائف جیکٹس اور ڈی واٹرنگ پمپس مہیا کر دیئے گئے ہیں۔
اس موقع پر چیف سیکرٹری نے ہدایت کی کہ ممکنہ سیلاب سے نمٹنے کیلئے تمام انتظامات مکمل رکھے جائیں، پی ڈی ایم اے ہنگامی صورتحال میں متاثرہ علاقوں میں ٹینٹ اور راشن بیگز کی وافر دستیابی یقینی بنائے۔
چیف سیکرٹری پنجاب کا کہنا تھا کہ اربن فلڈنگ سے بچنے کیلئے ڈرینز اور سیوریج لائنز کی باقاعدگی سے صفائی کی جائے۔ بارشوں کے دوران نشیبی علاقوں سے نکاسی آب کیلئے خصوصی اقدامات کئے جائیں۔ تمام مشینری اور ڈی واٹرنگ پمپس کو مکمل فعا ل رکھا جائے۔
انہوں نے ڈپٹی کمشنرز کو محکمہ آبپاشی کے افسران کے ہمراہ دریاؤں پر قائم بندوں کے معائنے کرنے کی ہدایات جاری کرتے ہوئے کہا کہ فلڈ ایمرجنسی پلان پر عملدرآمد ضلعی انتظامیہ کی ذمہ داری ہے، سیلاب سے متاثرہ علاقوں میں پانی کھڑا ہونے کے باعث وبائی امراض پھیلنے کا خدشہ ہوتا ہے، محکمہ صحت ہسپتالوں اور مراکز صحت میں ادویات، ویکسیئن کی فراہمی یقینی بنائے۔
