عروبہ مرزا نے ثاقب چدھڑ سے منسوب میسجز شیئر کر دیے
اداکارہ نے اپنی انسٹاگرام اسٹوریز پر چند مبینہ اسکرین شاٹس شیئر کیے، جن میں ان کے مطابق ثاقب چدھڑ کی جانب سے گفتگو شروع کرنے اور رابطہ جاری رکھنے کی درخواستیں شامل ہیں۔
عروبہ مرزا نے ان اسکرین شاٹس کے ساتھ تحریر کیا کہ مومنہ اقبال، سیدہ طوبیٰ اور اب میں بھی، جس کے بعد یہ معاملہ سوشل میڈیا پر ایک بار پھر زیر بحث آ گیا۔
ذہن نشین رہے کہ عروبہ مرزا کی جانب سے یہ پوسٹس ایسے وقت میں سامنے آئی ہیں جب ثاقب چدھڑ پہلے ہی ایک تنازع کے باعث خبروں میں ہیں، ان پر الزام عائد کیا گیا تھا کہ انہوں نے اداکارہ اور میزبان سیدہ طوبیٰ کو بطور تحفہ آئی فون دینے کی پیشکش کی تھی، تاہم اس معاملے سے متعلق تمام دعوے اور الزامات قانونی و عدالتی مراحل کا حصہ ہیں۔
اس سے قبل اداکارہ مومنہ اقبال بھی ثاقب چدھڑ کے خلاف قانونی کارروائی کر چکی ہیں، مومنہ اقبال کی درخواست کے مطابق انہوں نے رکنِ اسمبلی پر سائبر اسٹاکنگ، مبینہ ہراسانی، بلیک میلنگ اور شادی کی پیشکش مسترد کرنے کے بعد دھمکیاں دینے جیسے الزامات عائد کیے ہیں۔
یہ مقدمہ پریوینشن آف الیکٹرانک کرائمز ایکٹ (پیکا) کے تحت درج کیا گیا ہے، جبکہ اس معاملے کی تحقیقات نیشنل سائبر کرائم انویسٹی گیشن ایجنسی (این سی سی آئی اے) کر رہی ہے۔
یہ بھی پڑھیں:یوٹیوبر رجب بٹ ارب پتی بن گئے؟ پہلی بار حیران کن انکشافات
مومنہ اقبال متعدد مواقع پر کہہ چکی ہیں کہ وہ انصاف کی خواہاں ہیں اور انہوں نے عدالت سے باہر کسی بھی ممکنہ سمجھوتے کی خبروں کی تردید کی ہے، ان کا مؤقف ہے کہ فرانزک شواہد تحقیقات میں اہم کردار ادا کر رہے ہیں، مقدمہ تاحال عدالت میں زیرِ سماعت ہے۔
