عامر خان نے تیسری شادی کر لی
بھارتی میڈیا کے مطابق یہ تقریب اتوار کے روز ممبئی میں عامر خان کی رہائش گاہ پر منعقد ہوئی، جہاں انتہائی سادگی کے ساتھ دونوں نے نکاح کے بندھن میں بندھنے کا فیصلہ کیا۔
رپورٹس کے مطابق یہ شادی اسپیشل میرج ایکٹ کے تحت رجسٹر کی گئی، تقریب میں صرف انتہائی قریبی اہل خانہ اور چند دوستوں نے شرکت کی، شادی کے موقع پر ماحول خوشگوار اور خاندانی نوعیت کا تھا۔
تقریب میں عامر خان کے بچوں جنید، آئرہ اور آزاد سمیت ان کے قریبی رشتہ دار بھی موجود تھے، جنہوں نے اس موقع پر خوشی کا اظہار کیا۔
واضح رہے کہ گوری سپراٹ اور عامر خان ایک دوسرے کو تقریباً پچیس برس سے جانتے تھے، تاہم 2024 میں دوبارہ رابطے کے بعد دونوں کے درمیان تعلقات مزید مضبوط ہوئے۔
عامر خان نے مارچ 2025 میں اپنی ساٹھویں سالگرہ کے موقع پر پہلی بار گوری سپراٹ کو اپنی قریبی ساتھی کے طور پر عوام کے سامنے متعارف کروایا تھا، جس کے بعد ان کے تعلقات میڈیا کی توجہ کا مرکز بنے رہے۔
یہ بھی پڑھیں:عامر اور گوری کی شادی میں مدعو مہمانوں کی تفصیلات سامنے آگئیں
یہ عامر خان کی تیسری شادی ہے، اس سے قبل انہوں نے رینا دتا اور بعد ازاں فلم ساز کرن راؤ سے شادی کی تھی، جو بعد میں علیحدگی پر ختم ہو گئی۔ نئی شادی کے بعد مداحوں اور فلمی حلقوں میں مختلف ردعمل سامنے آ رہے ہیں، جبکہ سوشل میڈیا پر بھی یہ خبر تیزی سے وائرل ہو رہی ہے۔
