ان کی عمر 76 برس تھی، ان کے انتقال کی خبر سامنے آتے ہی فنونِ لطیفہ سے وابستہ حلقوں اور مداحوں میں گہرے دکھ اور افسوس کی لہر دوڑ گئی۔
خاندانی ذرائع کے مطابق عاصم بخاری گزشتہ کئی روز سے علیل تھے اور لاہور کے ایک ہسپتال میں زیر علاج تھے، طبیعت زیادہ بگڑنے کے باعث وہ گزشتہ رات بے ہوشی کی حالت میں چلے گئے تھے اور پھر جانبر نہ ہو سکے۔
معالجین کے مطابق مرحوم اداکار کچھ عرصے سے دل اور گردوں کے عارضے میں مبتلا تھے اور گزشتہ 15 روز سے ان کا علاج جاری تھا۔
واضح رہے کہ عاصم بخاری نے اپنے طویل فنی سفر کے دوران متعدد ڈراموں، فلموں اور اسٹیج کے پروگراموں میں یادگار کردار ادا کیے۔ ان کی اداکاری کو ہمیشہ حقیقت کے قریب اور جاندار قرار دیا جاتا تھا۔
فنونِ لطیفہ کے حلقوں میں انہیں ایک تجربہ کار فنکار اور استاد کی حیثیت حاصل تھی، انہوں نے کئی نئے فنکاروں کی رہنمائی کی اور ان کی تربیت میں اہم کردار ادا کیا۔
یہ بھی پڑھیں:سابق وزیر اعلی فاروق عبداللہ پر قاتلانہ حملہ ناکام، ویڈیو وائرل
ان کے انتقال کی خبر ملتے ہی فنکار برادری اور مداحوں نے گہرے دکھ کا اظہار کیا اور ان کی فنی خدمات کو خراجِ عقیدت پیش کیا، اہل خانہ کے مطابق ان کی نماز جنازہ اور تدفین سے متعلق تفصیلات بعد میں جاری کی جائیں گی۔
