جولائی 2024 میں احمد علی بٹ کو دیے گئے انٹرویو میں حمیرا اصغر نے بتایا تھا کہ ان کا تعلق پنجاب کے دارالحکومت لاہور سے ہے۔ ان کے دو بھائی اور دو بہنیں ہیں وہ سب سے چھوٹی ہیں۔

انہوں نے مزید بتایا کہ ان کی والدہ کا تعلق قصور سے ہے جبکہ والد کشمیری ہیں اور دونوں پاک فوج میں تھے، جہاں دونوں کو آپس میں محبت ہوئی تو شادی کرلی۔

اپنے انٹرویو میں انہوں نے یہ بھی کہا تھا کہ انہوں نے بہت سارے خواب دیکھ رکھے ہیں اور اگر وہ خواب پورے نہ ہوئے تو وہ خود کو معاف نہیں کر پائیں گی۔ وہ اپنی ذات کے حوالے سے سخت مزاج رکھتی ہیں، وہ خود کو معاف نہیں کرپاتیں۔

یہ بھی پڑھیں: اداکارہ نتاشہ علی نے ٹک ٹاکرز کو آڑے ہاتھوں لے لیا

ایک سوال کے جواب میں اداکارہ نے کہا کہ شوبز انڈسٹری میں بہت منافقت ہے اورانہیں انڈسٹری کی منافقت سے نفرت ہے۔

اداکارہ نے ایک اور سوال کے جواب میں کہا تھا کہ وہ منشیات کا استعمال کبھی نہیں کریں گی۔ اسی حوالے سے اداکارہ نے کہا تھا کہ ہمارے معاشرے میں اسکول، کالجز اور یونیورسٹیز سے لے کر عام پارٹیوں میں منشیات کا استعمال بہت زیادہ ہو چکا ہے، کم عمر افراد سمیت ہر کوئی منشیات استعمال کرتا دکھائی دیتا ہے۔

اداکارہ کا تقریبا ایک سال پرانا انٹرویو وائرل ہوگیا اور صارفین نے ان کے انٹرویو پر ملے جلے عمل کا اظہار بھی کیا۔