ڈیزل کی قیمت نے تمام حدیں پار کردیں
غیرملکی خبر رساں ادارے کے مطابق امریکی ریاست کیلیفورنیا کے شہر سان ڈیاگو میں ایک گیس اسٹیشن پر ڈیزل کی قیمت 9.99 ڈالر فی گیلن تک پہنچ گئی، جس نے صارفین کو حیران کردیا ہے۔
رپورٹ کے مطابق سان ڈیاگو کے سیرا میسا علاقے میں واقع شیل گیس اسٹیشن پر جمعہ کے روز ڈیزل 9.99 ڈالر فی گیلن میں فروخت کیا جارہا تھا۔ اسٹیشن کے ایک ملازم نے بھی اس قیمت کی تصدیق کرتے ہوئے بتایا کہ اس نرخ پر ڈیزل دستیاب تھا۔
ڈیزل کی قیمت میں یہ غیر معمولی اضافہ ایسے وقت میں سامنے آیا ہے جب امریکا میں ایندھن کی قیمتوں اور عالمی توانائی کی منڈی پر دباؤ بڑھ رہا ہے۔ کیلیفورنیا میں پہلے ہی دیگر ریاستوں کے مقابلے میں ایندھن کی قیمتیں بلند رہتی ہیں، جس کے باعث شہریوں اور کاروباری شعبے کو اضافی مالی دباؤ کا سامنا ہے۔
دلچسپ بات یہ ہے کہ 9.99 ڈالر فی گیلن کی قیمت گیس اسٹیشن کے الیکٹرانک بورڈز کیلئے بھی ایک اہم حد بن گئی ہے۔ کئی اسٹیشنوں کے قیمت ظاہر کرنے والے بورڈز تین ہندسوں تک محدود ہوتے ہیں، اس لیے اس سے زیادہ قیمت دکھانا تکنیکی طور پر ممکن نہیں۔
یہ بھی پڑھیں:سونے کی فی تولہ نئی قیمت سامنے آگئی
ماہرین کے مطابق اگر ایندھن کی قیمتوں میں مزید اضافہ ہوا تو صارفین کے اخراجات مزید بڑھ سکتے ہیں۔ سان ڈیاگو میں ڈیزل کا 9.99 ڈالر فی گیلن تک پہنچنا امریکی توانائی مارکیٹ میں بڑھتے دباؤ کی واضح علامت قرار دیا جارہا ہے۔
