پاکستان اسٹاک مارکیٹ میں شدید مندی کا رجحان
پاکستان اسٹاک ایکسچینج میں کاروباری سرگرمیوں کے دوران فروخت کا دباؤ نمایاں رہا اور ہنڈریڈ انڈیکس میں ایک ہزار 757 پوائنٹس کی بڑی کمی ریکارڈ کی گئی، شدید مندی کے باعث ہنڈریڈ انڈیکس ایک لاکھ 67 ہزار پوائنٹس کی سطح پر ٹریڈ کرتا رہا۔
مارکیٹ میں اچانک آنے والی اس بڑی گراوٹ نے سرمایہ کاروں کو محتاط کر دیا ہے۔ کاروباری حلقوں کے مطابق عالمی سطح پر پیدا ہونے والی غیر یقینی صورتحال اور خطے میں بڑھتی ہوئی کشیدگی کے اثرات مقامی اسٹاک مارکیٹ پر بھی نمایاں ہو رہے ہیں۔
دوسری جانب ایران جنگ کے باعث عالمی منڈی میں خام تیل کی قیمتوں میں ایک بار پھر بڑا اضافہ ہوا ہے، جس سے عالمی معیشت کے حوالے سے بھی خدشات بڑھ گئے ہیں۔
عالمی مارکیٹ میں دوران کاروبار برینٹ خام تیل کی قیمت میں 7.1 فیصد تک اضافہ ریکارڈ کیا گیا، جس کے بعد برینٹ خام تیل کی قیمت 108 ڈالر فی بیرل تک پہنچ گئی۔
عالمی سطح پر تیل کی قیمتوں میں اضافے کو خطے میں جاری جنگ اور جغرافیائی کشیدگی سے جوڑا جا رہا ہے۔ خام تیل کی قیمتوں میں مسلسل اضافے سے درآمدی ممالک کے مالی دباؤ میں اضافے کا خدشہ ہے، پاکستان جیسی معیشتوں پر بھی اس کے اثرات مرتب ہو سکتے ہیں۔
یہ بھی پڑھیں:عالمی منڈی میں تیل کی قیمتوں میں ریکارڈ اضافہ
معاشی ماہرین کا کہنا ہے کہ عالمی حالات میں بہتری نہ آنے کی صورت میں آنے والے دنوں میں پاکستان اسٹاک مارکیٹ میں اتار چڑھاؤ برقرار رہنے کا امکان ہے۔
