سونے کی قیمت میں بڑا اضافہ، فی تولہ کتنے کا ہوگیا؟
آل پاکستان صرافہ ایسوسی ایشن کے مطابق ملک بھر میں 24 کیرٹ فی تولہ سونے کی قیمت 800 روپے اضافے کے بعد 4 لاکھ 62 ہزار 936 روپے ہوگئی۔
گزشتہ روز سونے کی قیمت میں کمی کے بعد آج ایک بار پھر قیمت بڑھنے سے شہریوں کی جانب سے سونے کی خریداری مزید مہنگی ہوگئی۔
صرافہ ایسوسی ایشن کے اعداد و شمار کے مطابق 10 گرام سونے کی قیمت میں بھی اضافہ ہوا، 10 گرام سونا 686 روپے مہنگا ہوکر 3 لاکھ 96 ہزار 893 روپے کا ہوگیا ہے۔
دوسری جانب ملک میں چاندی کی قیمت میں بھی اضافہ ریکارڈ کیا گیا،جس کے بعد فی تولہ چاندی کی قیمت 72 روپے بڑھ کر 7 ہزار 141 روپے ہوگئی۔
عالمی منڈی میں بھی سونے کی قیمت میں اضافے کا رجحان دیکھا گیا، عالمی مارکیٹ میں فی اونس سونے کی قیمت 8 ڈالر اضافے کے بعد 4 ہزار 404 ڈالر ہوگئی۔
معاشی ماہرین کا کہنا ہے کہ عالمی مارکیٹ میں سونے کی قیمتوں میں اتار چڑھاؤ کا براہ راست اثر مقامی صرافہ مارکیٹ پر بھی پڑتا ہے، جس کے باعث پاکستان میں سونے کے نرخ روزانہ کی بنیاد پر تبدیل ہوتے رہتے ہیں۔
یہ بھی پڑھیں:خام تیل کی قیمتیں ایک بار پھر بے قابو
سونے کی قیمت میں حالیہ اضافے کے بعد شہریوں اور سرمایہ کاروں کی نظریں اب عالمی مارکیٹ کے آئندہ رجحان اور ملکی صرافہ مارکیٹ میں قیمتوں کی نئی صورتحال پر مرکوز ہیں۔
