عالمی منڈی میں خام تیل کی قیمتوں میں اتار چڑھاؤ
ابتدائی کاروبار کے دوران اکتوبر میں ترسیل کیلئے برینٹ کروڈ کے معاہدوں کی قیمت میں 25 سینٹ، یعنی 0.3 فیصد اضافہ ریکارڈ کیا گیا، جس کے بعد برینٹ کروڈ 92 ڈالر فی بیرل کی سطح پر پہنچ گیا۔
دوسری جانب ستمبر کی ترسیل کیلئے امریکی ویسٹ ٹیکساس انٹرمیڈیٹ کی قیمت میں 2 سینٹ کی معمولی کمی ہوئی، جس کے بعد یہ 85.81 ڈالر فی بیرل پر آگئی۔
مارکیٹ میں زیادہ سرگرمی رکھنے والے اکتوبر کے معاہدے میں بھی معمولی اضافہ دیکھا گیا۔ اکتوبر کے معاہدے کی قیمت 14 سینٹ، یعنی 0.2 فیصد بڑھ کر 84.53 ڈالر فی بیرل ہوگئی۔
عالمی توانائی مارکیٹ میں حالیہ دنوں کے دوران خام تیل کی قیمتوں میں مسلسل دباؤ دیکھا جارہا ہے، اس سے ایک روز قبل بدھ کو بھی برینٹ اور دونوں اہم بینچ مارک مسلسل چوتھے کاروباری سیشن میں اضافے کے ساتھ بند ہوئے تھے۔
بدھ کی کاروباری سرگرمی کے اختتام پر دونوں بینچ مارک 24 جولائی کے بعد اپنی بلند ترین سطح پر پہنچ گئے تھے، جس سے عالمی مارکیٹ میں سپلائی سے متعلق خدشات اور جغرافیائی سیاسی کشیدگی کے اثرات واضح ہوتے ہیں۔
مارکیٹ ماہرین کے مطابق سرمایہ کار خصوصاً آبنائے ہرمز کی صورتحال پر نظر رکھے ہوئے ہیں، کیونکہ یہ عالمی سطح پر تیل کی ترسیل کیلئے انتہائی اہم بحری راستہ ہے۔ خطے میں کشیدگی بڑھنے کی صورت میں عالمی تیل کی سپلائی اور قیمتوں پر مزید اثر پڑنے کا خدشہ موجود ہے۔
یہ بھی پڑھیں:سونے کی قیمت میں بڑی کمی، فی تولہ کتنے کا ہوگیا؟
تجزیہ کاروں کا کہنا ہے کہ آنے والے دنوں میں امریکا اور ایران کے درمیان صورتحال اور خطے میں بحری آمدورفت عالمی تیل مارکیٹ کی سمت کے تعین میں اہم کردار ادا کرسکتی ہے۔
