عالمی منڈی میں تیل مسلسل چوتھے روز مہنگا
عالمی مارکیٹ میں برینٹ خام تیل کے مستقبل کے معاہدے 26 سینٹ یا 0.29 فیصد اضافے کے بعد 91.80 ڈالر فی بیرل پر پہنچ گئے، جبکہ امریکی ویسٹ ٹیکساس انٹرمیڈیٹ خام تیل کی قیمت 37 سینٹ اضافے سے 85.60 ڈالر فی بیرل ہوگئی۔ دوسری جانب اماراتی مربن خام تیل بھی 97 ڈالر فی بیرل سے زائد کی سطح پر فروخت ہونے لگا۔
برینٹ اور ڈبلیو ٹی آئی دونوں معاہدوں نے منگل کو 24 جولائی کے بعد بلند ترین سطح پر کاروبار بند کیا تھا۔ مارکیٹ میں تیل کی قیمتوں کو امریکا اور ایران کے درمیان امن مذاکرات کے امکانات کم ہونے سے بھی سہارا ملا ہے۔
امریکی صدر ڈونلڈ ٹرمپ نے منگل کو کہا تھا کہ ایران کے ساتھ کوئی مذاکرات نہیں ہو رہے اور آبنائے ہرمز کھلی ہے۔ تاہم ایران نے اس کے برعکس مؤقف اختیار کرتے ہوئے کہا کہ اہم آبی گزرگاہ بدستور جہاز رانی کیلئے بند ہے۔
دونوں ممالک کے درمیان عارضی جنگ بندی کا معاہدہ پیر کو ختم ہوگیا تھا، جس کے بعد خطے میں کشیدگی اور مستقبل کی صورتحال کے حوالے سے خدشات میں اضافہ ہوا ہے۔
ایک سینئر ایرانی عہدیدار نے رائٹرز کو بتایا کہ سفارتی تعطل کے باعث ایران مزید اقدامات کی جانب بڑھ رہا ہے، تاہم منگل کو فریقین کے درمیان کسی نئے حملے کی اطلاعات سامنے نہیں آئیں۔
دریں اثنا آبنائے ہرمز کے ذریعے تیل کی ترسیل میں ممکنہ رکاوٹ سے بچنے کیلئے عراق نے بھی متبادل راستہ اختیار کرنے کی تیاری شروع کردی ہے۔ عراقی کابینہ نے خام تیل کی برآمد کیلئے نئے طریقہ کار کی منظوری دے دی۔
یہ بھی پڑھیں:بجلی کی قیمت میں بڑے اضافے کی تیاری
حکومتی بیان کے مطابق اس منصوبے کے تحت عراقی خام تیل خصوصی بین الاقوامی اور مقامی کمپنیوں کے ذریعے متعدد برآمدی راستوں سے بھیجا جائے گا، نئے معاہدے یکم ستمبر سے تین ماہ کے لیے ہوں گے۔
