امارات میں جولائی کیلئے پٹرولیم مصنوعات سستی ہونے کا امکان
رپورٹ کے مطابق یو اے ای میں ایندھن کی نئی قیمتوں کا اعلان کل کیا جائے گا، عالمی منڈی میں خام تیل کی قیمتوں میں کمی کے بعد امارات میں بھی پٹرولیم مصنوعات سستی ہونے کی توقع ہے۔
ماہرین کے مطابق مشرق وسطیٰ میں کشیدگی کے باعث خام تیل کی قیمتیں کچھ عرصہ بلند سطح پر رہیں، تاہم بعد ازاں عالمی منڈی میں تیل کی قیمتوں میں نمایاں کمی دیکھی گئی، جس سے ایندھن کی مد میں عوام کو ریلیف ملنے کی امید پیدا ہوئی ہے۔
رپورٹ کے مطابق ہفتے کے اختتام پر امریکا اور ایران کے درمیان دوبارہ فوجی کارروائیوں کی اطلاعات نے عالمی مارکیٹ کو ایک بار پھر غیر یقینی صورتحال سے دوچار کر دی، اسی وجہ سے تیل کی قیمتوں میں کمی کا رجحان مکمل طور پر مستحکم نہیں ہو سکا۔
پیر کے روز عالمی منڈی میں خام تیل برینٹ کروڈ کی قیمت تقریباً 73.18 ڈالر فی بیرل ریکارڈ کی گئی، جو معمولی اضافے کے باوجود کشیدگی سے قبل 72 ڈالر فی بیرل کی سطح کے قریب ہے، اسی طرح امریکی خام تیل ویسٹ ٹیکساس انٹرمیڈیٹ کی قیمت بڑھ کر 69.96 ڈالر فی بیرل تک پہنچ گئی۔
یہ بھی پڑھیں: عالمی مارکیٹ میں خام تیل کی قیمتیں 4 ماہ کی کم ترین سطح پر پہنچ گئیں
اس سے قبل مئی کے دوران آبنائے ہرمز سے متعلق خدشات کے باعث برینٹ کروڈ کی اوسط قیمت تقریباً 106 ڈالر فی بیرل رہی تھی، جبکہ کشیدگی کے دوران قیمتیں عارضی طور پر 110 سے 120 ڈالر فی بیرل تک بھی پہنچ گئی تھیں۔
متحدہ عرب امارات میں پٹرولیم مصنوعات کی قیمتیں ہر ماہ گزشتہ مہینے کی عالمی خام تیل قیمتوں کی اوسط بنیاد پر مقرر کی جاتی ہیں، اس لیے عالمی منڈی میں کمی کا اثر صارفین تک منتقل ہونے کا امکان ہے۔
