عالمی منڈی میں تیل مہنگا ہوگیا
بین الاقوامی تجارتی اعداد و شمار کے مطابق برینٹ کروڈ آئل کی قیمت 1.54 فیصد اضافے کے بعد 95 ڈالر فی بیرل تک پہنچ گئی۔ اسی طرح امریکی ویسٹ ٹیکساس انٹرمیڈیٹ (WTI) خام تیل بھی 1.81 فیصد اضافے کے ساتھ 92 ڈالر فی بیرل پر ٹریڈ کر رہا ہے۔
عالمی مارکیٹ میں اماراتی مربن آئل کی قیمت میں بھی اضافہ دیکھا گیا، جو تقریباً 1.98 فیصد بڑھ کر 90 ڈالر فی بیرل کی سطح تک جا پہنچی۔
معاشی ماہرین کا کہنا ہے کہ خطے میں پیدا ہونے والی غیر یقینی صورتحال نے عالمی سرمایہ کاروں اور توانائی کے شعبے میں تشویش پیدا کر دی ہے۔
اقتصادی تجزیہ کاروں کا کہنا ہے کہ مشرقِ وسطیٰ دنیا کی توانائی سپلائی کا اہم مرکز ہے، اس لیے وہاں کسی بھی قسم کی فوجی یا سیاسی کشیدگی تیل کی عالمی منڈیوں پر فوری اثر ڈالتی ہے۔
حالیہ صورتحال کے باعث سپلائی میں ممکنہ رکاوٹوں کے خدشات بڑھ گئے ہیں، جس کی وجہ سے قیمتوں میں تیزی دیکھی جا رہی ہے۔
یہ بھی پڑھیں:امریکی حملے کا نشانہ بننے والا جہاز بھارتی نکلا
ماہرین نے خبردار کیا ہے کہ اگر ایران اور امریکا کے درمیان تناؤ میں مزید اضافہ ہوا تو خام تیل کی قیمتیں مزید بلند ہو سکتی ہیں۔ ان کے مطابق تیل مہنگا ہونے سے دنیا بھر میں مہنگائی کے دباؤ میں اضافہ اور مختلف معیشتوں کو نئے چیلنجز کا سامنا کرنا پڑ سکتا ہے۔
