کاروباری ہفتے کے دوسرے روز جیسے ہی لین دین کا آغاز ہوا، مارکیٹ میں خریداری کا رجحان غالب آ گیا اور اہم اشاریہ تیزی سے اوپر کی جانب بڑھنے لگا۔
اعداد و شمار کے مطابق ہنڈرڈ انڈیکس میں 1800 سے زائد پوائنٹس کا اضافہ ریکارڈ کیا گیا، جس کے بعد انڈیکس 1 لاکھ 73 ہزار 999 پوائنٹس کی سطح تک جا پہنچا، یہ تیزی حالیہ مندی کے بعد ایک مثبت اشارہ ہے اور اس سے مارکیٹ میں استحکام کی امید پیدا ہوئی ہے۔
ذہن نشین رہے کہ گزشتہ کاروباری دن کے اختتام پر مارکیٹ میں مندی کا رجحان دیکھا گیا تھا، جب ہنڈرڈ انڈیکس 1 ہزار 742 پوائنٹس کی کمی کے ساتھ 1 لاکھ 72 ہزار 196 پوائنٹس پر بند ہوا تھا، تاہم آج کی تیزی نے اس کمی کا بڑا حصہ پورا کر دیا ہے۔
دوسری جانب ایشیائی منڈیوں میں ملا جلا رجحان دیکھنے میں آ رہا ہے، جنوبی کوریا، جاپان اور ملائیشیا کی مارکیٹس میں اضافہ ریکارڈ کیا گیا، جبکہ چین اور انڈونیشیا کی منڈیوں میں معمولی کمی دیکھنے میں آئی۔
یہ بھی پڑھیں:دو سالوں میں سرکاری قرضوں میں ریکارڈ اضافہ
معاشی ماہرین کا کہنا ہے کہ عالمی معاشی حالات اور سرمایہ کاری کے رجحانات خطے کی مارکیٹس پر اثر انداز ہو رہے ہیں۔
تجزیہ کاروں کا کہنا ہے کہ اگر یہی رجحان برقرار رہا تو آنے والے دنوں میں مزید بہتری کی توقع کی جا سکتی ہے، تاہم سرمایہ کاروں کو محتاط حکمت عملی اپنانے کا مشورہ بھی دیا گیا ہے۔
