کراچی میں تاجر برادری سے گفتگو کرتے ہوئے انہوں نے کہا کہ آئندہ جمعہ کو پیٹرول کی قیمتوں میں کمی کا امکان ہے اور یہ فیصلہ عالمی منڈی میں تیل کی قیمتوں کو مدنظر رکھتے ہوئے کیا جائے گا، حکومت عوام کو زیادہ سے زیادہ ریلیف دینے کیلئے اقدامات کر رہی ہے۔
بلال اظہر کیانی نے کہا کہ حالیہ جنگ بندی کے مثبت اثرات نہ صرف پاکستان بلکہ عالمی معیشت پر بھی مرتب ہو رہے ہیں، اس موقع کو معاشی بہتری کیلئے استعمال کیا جائے گا تاکہ ملک میں استحکام آئے۔
انہوں نے مزید کہا کہ پاکستان چار سال بعد دوبارہ عالمی مالیاتی منڈی میں شمولیت کے قابل ہوا ہے، جو ایک اہم پیش رفت ہے، کراچی ملک کی معاشی سرگرمیوں کا مرکز ہے اور ان کے دورے کا مقصد یہاں درپیش مسائل کو سمجھ کر ان کا حل نکالنا ہے۔
وزیر مملکت نے یقین دلایا کہ حکومت کاروباری برادری کو درپیش مشکلات کم کرنے اور سرمایہ کاری کے مواقع بڑھانے کیلئے سنجیدہ اقدامات کر رہی ہے۔
یہ بھی پڑھیں:خام تیل کی قیمتوں میں ایک بار پھر بڑی کمی
معاشی ماہرین کا کہنا ہے کہ اگر پیٹرول کی قیمت میں کمی کی جاتی ہے تو اس کے اثرات ٹرانسپورٹ اور اشیائے ضروریہ کی قیمتوں پر بھی پڑیں گے، جس سے عام شہری کو براہ راست فائدہ پہنچ سکتا ہے۔
